Shillong, Naitung 18: U Myntri ka Tnad Transport Bah Dasakhiat Lamare, hynne ka sngi nyngkong, ula pyntip ba ka Tnad ka dang pynkhreh mynta ia ki kyndon ban ailad biang ia ki Rapido ba kin kamai hynrei kane kyndon kan khmih eh ia ka jingpynbiang tarajur hapdeng ka jingkamai ki kali arshaka bad ki Taxi.
Kat kum ka jingong jong u Myntri, ki taxi kila shah ktah bha ha ka kamai kajih da ka jingnang bun bad jingnang paw ka rukom kamai ki kali arshaka.
Halor ka jingduh kamai jong ki kali arshaka bad ka jingthnum u paidbah ia ka jingjur ka dheng kali bad ka jingrem dor ka bai kali jong ki taxi, u Myntri ula ong ba ula tip ia ka jingduna ka bai leit bai wan na kine ki kali kamai arshaka bad ruh ka jinglait na ka jingdheng kali khamtam hangne ha Nongbah Shillong kaba la khapngiah.
“Ka jingtip ba nga ioh ka long ba ka bai kali ka duna bad kim ju kham sahkut ha ka jingdheng kali hapoh ka Nongbah Shillong” ula ong.
U Myntri ula kubur ruh ia ka jingaikam aijam kane ka jingkamai ki kali arshaka bad ong “Ka dei kaba shisha ban ong baka la ktah ia ka jingiohkam iohjam namar kine ki Rapido hi ki aikam aijam….” Hynrei ka don ruh ka jingpynsngew na ki Nongniah Taxi ne kali kamai saw shaka, kiba la shah ktah jur ha ka kamai ka kajih da ka jingwan ki rapido.
Haba pyntip ba kila don shibun ki jingujor na ki nongniah taxi, u Myntri ula ong “Ki Nongniah taxi ki khlem ong ia ngi ban khang noh. Hynrei kila kyrpad ia ka Tnad lane ia kino kino ki bor ba kin leh eiei khnang ba kan ym ktah eh ia ki”.
U Myntri u iathuh ba ka Sorkar kala pyrshang ban leh ia kaba bha tam ha kaban wanrah ia ka jingiahun lang bad ka jing iamyntoi lang jong baroh ki nongniah taxi kamai bad ki nongniah rapido.
U Myntri ula pynshai ruh ba ka Sorkar Jylla kam shym la pyndem tdong hangno hangno ruh hynrei kan sa shim ia ka rai ka ban ai jingmyntoi lang ia ki nongniah taxi bad ki rapido kiba ia kamai jakpoh.
