Aizawl, Naitung 18 :Naduh ba ki bor shipai ki la kurup ia ka bor synshar ha ka ri ba marjan hapoh Myanmar, haduh kumba 30,316 ngut ki nong Myanmar ka ba kynthup ia 11,798 ki khynnah bad 10,047 ngut ki kynthei ki la shong riehtngen ha ki ba bun ki bynta jong ka jylla Mizoram.
Katkum ka kaiphot, la iathuh ba 14 ngut na ki nongthaw ain ruh ki dei napdeng kito ki ba la phet krad na katei ka ri ka ba don hapdeng ka jingiakynad shapoh Mizoram.
“Na ki 30,316 ngut ki briew ka jingshim kyrteng na ka bynta ki 30,299 ngut la lah ban pyndep.Nalor kata la ai ruh ia ki identity card ki ba pynithuh ia ki kum ki phetwir sha kumba 30,000 ngut ki phetwir,” ong u heh sorkar.
Ia kine ki card ba la ai na ka liang ka sorkar jylla, lah ban pyndonkam tang ha ka ba iadei bad ka jingpynithuh hapoh Mizoram bad kin ym treikam na ka bynta ban ioh ia ki skhim sorkar.Ia kine ki ID la sam sha kine ki phetwir na ka bynta ban pynthikna ba ki dei ki nongshong shnong ka Myanmar.
“Nalor kata yn pynjngai ruh na kito ki briew ki ba lah ban don ia ka jingangnud ban pynioh ia kine ki phetwir ia ka jinglong nongshong shnong jong ka India na ka bynta ki jingioh nong ha ki kam sain hima sima,” ong u heh sorkar.
Katkum ka kaiphot, ki la don ahduh kumba 156 tylli ki jaka shong shipor ba la pynkhreh na ka liang ka sorkar, ki kynhun sengbhalang, ki bor shnong bad na ka liang ki nongshong shnong ka Myanmar ha ki bynta bapher bapher ka jylla, ha ka ba ka Siaha district ka dei ka ba don bun eh kine ki jaka shong shipor, kata haduh 41 tylli, bud sa ka Lawngtlai 36 bad ka Champhai 33 tylli.
Hynriew tylli ki district ka Mizoram, kata ka Champhai, Siaha, Lawngtlai, Serchhip, Hnahthial bad ka Saitual ki ia sam lang ia ka bynta khappud ka ba 510 km bad ka jylla China jong ka Myanmar.
