Shillong, Naitung 18: Ka elekshon jied President ba thymmai ka Ri ba long hynne ka sngi nyngkong, kala iaid beit iaid ryntih ha Jylla Meghalaya bad haduh 56 ngut ki MLA bad u MP ka Rajya Sabha, kila iashimbynta ha ka jingiathep vote.
Haduh 4 ngut ki MLA kynthup ia arngut ki MLA na ka Liang Synshar bad arngut na ka Liang Pyrshah kila jah bad khlem iashimbynta satia ha kane ka jingiathep vote kaba la pynlong hapoh ka Meghalaya Legislative Assembly Building, Rilbong.
Kane ka jingiathep vote kala sdang naduh ka por 10 baje mynstep bad kut ha ka por 5 baje janmiet. U MLA ka NPP u Thomas Sangma u long u nongmihkhmat uba la thep nyngkong eh ia ka vote katba u MLA ka KHNAM u Bah Adelbert Nongrum udei u nongmihkhmat uba la thep vote khatduh eh.
U Chief Electoral Officer (CEO) Bah Frederick Kharkongor ula iathuh ba 56 ngut ki MLA na ki 60 ngut bad u MP ba marwei sha Rajya Sabha Dr WR Kharlukhi kila poi thep vote ha kane ka sngi.
Ki 4 ngut kiba jah ki dei ki Myntri Sorkar kata u James PK Sangma bad u ma Sniawbhalang Dhar kiba dei naka NPP bad arngut pat ki dei jong ka AITC ba kynthup ia u Marthon Sangma bad u ma Shitlang Pale.
Ka khubor ka iathuh ba u James PK Sangma u dang don sha United Kingdom katba u ma Sniawbhalang u dang shu mih na Hospital namar ka jingpang syngkai.
Katba u MLA ka AITC u Marthon Sangma u khlem lah ban poi iathep vote namar ka jingiabit ia ka jingpang Covid-19 katba u ma Shitlang pat la pyntip ba ym shim la tip satia ia ki daw ka jingpep jong u.
Ka matpdeng jong ka elekshon ka dei ‘Go Green’ ia kaba ka jingthmu jong ka, ka long ban pynsaphriang iaka khubor kiba iadei ne iahap bad ka jingpynjyrngam biang ia ka mariang.
Ka jingniew Vote kan long ha ka 21 tarik u Naitung bad ka jingpynkhamti ia ka kam President kan long haka 25 tarik u Naitung.
