Shillong, Iaiong 18: Ka seng saiñ pyrthei Voice of the People Party (VPP) hynne ka nsgi Hatmajai kala kyntu ia ki paidbah ba kin kiar ha kaban shna ia ki Group ha ki Social Media haka kyrteng jong ka seng VPP khlem da ioh jingbit na ka ophis jong ka seng.
U Nongaiktien ka VPP u Dr. Batskhem Myrboh ula pynpaw ia ka jingsngewkmen ïa ka jingnoh mynsiem jongki paidbah sha ka seng bad ha ka jingsngewieit bad jingangnud ban nang pynkhlain shuh ïaka seng, kila mih bun kiba shna ia ki WhatsApp Group bapher.
“Hynrei na ka liang ka Ophis jong ka Parti ka sngewdei ban kyrpad iaki paidbah ban kiar tyngeh ban shna ïa kum kine ki WhatsApp Group namar ki lah ban pynmih jingeh ki bym sngewtynnad ïa ka Parti. Kumta ngi kyrpad ia phi ban pynkut noh ia kum kine ki Group ba la dep shna bad ban kiar na kaba shna thymmai ia ki. Dei tang kito kiba la aibor da ka parti kiba lah ban shna ia kiWhatsapp Group ne kiwei pat ki social media group ha ka kyrteng jong ka Parti” la pynpaw u Dr Myrboh ha ka kyrwoh khubor.
Ula pynapw ba la donkam ban leh ia kane kadei namar ka jingdonkam ban wanrah ïa ka jingryntih (discipline) ha ka rukom treikam ka Parti bad ban nym ailad ïaka kynrum kynram kaba lah ban mih na ki riew shim kabu.
Shuh Shuh, ka Parti kan nym shim ïaka jingkitkhlieh lada jia eiei kaba sniew na ki social media group kiba shna ha ka kyrteng ka Parti kiba shna khlem da ioh jingbit na ka Ophis jong ka Parti bad ka seng ka ngeit skhem ba ki paidbah kin burom ia kane ka jingpynbeit na ka parti.
Pule lang ia kane: Pynpaw u Bah Hek ba dei ban pyntreikam ia ka Roster nangne shakhmat
