Shillong, April 18: U Myntri ka sorkar jylla uba long ruh u MLA ka Pynthorumkhrah u Bah Alexander Laloo Hek hynne ka sngi Hatmajai ula pynpaw ia ka jingsngew ba ka Roster System ka dei ban treikam naduh nangne shakhmat ym naduh ki snem bala leit noh.
Une u Nongialam ka BJP ula pyntip ba ula leit ban iakynduh ia u Myntri Rangbah ka jylla u Conrad K Sangma ban pynsngew ha kaba iadei bad ka Roster System bad kiwei kiwei ki mat.
Haba iakren bad ki nongthoh khubor, u Bah Hek ula ong, katkum ka jingsngew jongu shimet, dei ban pyntreikam iaka Roster System nangne shakhmat ym naduh ki por kiba mynshwa.
U Bah Hek ula pynpaw ba ka long kaba kongsan ban khmih biang iaka Reservation Policy kumba ka long mynta bad dei ban pynlong iaka jingiasyllok bad ka jingiatai da kaba khot lang ia baroh kiba don bynta.
Une u nongialam ka BJP ula ong, ba na ka liang ka seng BJP kala dep thung ia ka committee ha kaba iadei bad kane ka mat, ha kaba u MLA barim u Bah HM Shangpliang u long u Convener bad ki dkhot ki kynthup ia u MLA ka seng u Bah Sanbor Shullai, u President ka BJP u bah Ernest Mawrie, u nongaiktien ka BJP u Bah M. Kharkrang, ki Legal Adviser ka seng kiba kynthup ia u Bah Vivan G Kynta bad u SP Mahanta bad arngut ki nongialam ka seng na rilum Garo kiba kynthup ia u Edmund K Sangma bad ka Ferlin CA Sangma.
