Nongstoin, Iaiong 18: Ka District Disaster Management Authority (DDMA), West Khasi Hills District, Nongstoin hynne ka sngi ka la sam ia ki Emergency Response Kit (ERK) ne ki tiar ban pyndonkam haba iarap ia ki briew ba shem lanot na ki jinglynshop ki bor mariang sha ki 100 ngut ki Volunteer Aapna Mitra.
Ia kane ka prokram la pynlong hynne ka sngi ba-ar ha ka Conference Hall jong ka Nongstoin College ha Nongpyndeng, Nongstoin bad la pynshongkun ia ka da ka jingiadonlang u ADC ka WKH bad CEO ka DDMA Bah HK Thabah kum u Kongsan.
Haba ai jingkren, u Bah H.K Thabah u la pynpaw ia ka jingkhublei ia ka ophis jong u District Disaster Management Officer (DDMO), West Khasi Hills District, Nongstoin halor ka jingpynlong ia kane ka prokram ban sam ia kine ki tiar, ki ban iarap shi kat dei eh ia ki volunteer ba la ioh jinghikai ba kin pyndonkam, haba don kano kano ka jingjia shah pynjulor da ki bor mariang ne kino kino ki jingjia ba sngewsih.
U la kyntu ruh ia ki Volunteer Aapda Mitra, ba kin sam lem ia ka jingtip ba ki ioh lum lyngba ki jinghikai pyntbit ba kila ioh, sha la ki baieid bathoin bad hapdeng ka imlang sahlang kaba ki shong ki sah. Kumjuh ruh ban pyndonkam ruh ia ki tiar bad ki buit kumba la shah hikai ha ki lyngba ki prokram hikai ka DDMA jong ka distrik.
Lah ban kdew hangne ba kiba bun na ki volunteer kiba la ioh pdiang ia kine ki Emergency Response Kits, ki kynthup ia ki khynnah NCC bad NSS bad katto katne pat kidei kiwei pat ki khynnah samla jong ki dong bad ki shnong ka thain.
Kiwei kiwei pat kiba la kren ha kane ka sngi ki kynthup ia u District Disaster Management Officer (DDMO), DDMA, West Khasi Hills District, Nongstoin, u Bah J. Mawthoh, u Deputy Controller Civil Defence u ba dei ruh u ophisar ba dei peit ia ka prokram AAPDA MITRA ha West Khasi Hills District, u Bah W. Nonglang bad u Sub- Inspector, Civil Defence &Home Guards, Nongstoin, u Bah T.Tynsong.
