Shillong, Iaiong 18: U Myntri ka Tnad Pule Puthi Rakkam A Sangma hynne ka sngi ba-ar, ula ong ba ka Sorkar Jylla ka dang shong bishar mynta ia ka jingtyrwa ban pyntreikam lang noh da ka syllabus jong ka Central Board of School Education (CBSE) ha ki skul ka Jylla.
“Ngi dang bishar mynta ia ka jingtyrwa ban pyntreikam lang noh da ka CBSE curriculum khnang ban kyntiew ia ki rukom pule jong ki samla pule ka Jylla” ong u Rakkam haba iakren bad ki nongthoh khubor.
“Ka lah ban nym dei baroh hynrei katto katne ki syllabus bad kawei ka sienjam hadien kawei pat, ngin dang bishar ba kumno ngin wanrah ia kaba bha tam ia ki samla pule ha ka pule ka dangle” ula bynrap.
U Myntri ula ban jur ba ka jingthmu jong kane hi ka long ban kyntiew ia ka rukom pule jong ki samla pule ka Jylla ka ban iaryngkat kyrdan bad kiwei pat hapoh ka Ri.
