Shillong Naiwieng 18: Ka Cherry Blossom kala long ka jingai jingmyntoi ia ki nongpyniaid ia ki Hotel, ha kaba ki Hotel kiba don ha Shillong kidei kiba lah dep ban bat lypa lut haduh uba kut jong u bnai Nohprah, la ong u President ka Federation of Shillong Hotels u Parambir Singh ha ka sngi Baar.
“Ki Hotel kidei kiba lah jan dap lut smam bad kane kan sa urlong haduh ban da kut u bnai Nohprah. Ka Cherry Blossom kadei sa kawei ka jingmyntoi kaba ki nongpyniaid ia ki hotel kin ioh, namar ba ka jingwan tuid ki nongjngohkai kan kiew bha bad kumba long ia mynta hi baroh ki hotel kidei kiba lah dep bat lypa” ong u Singh.

Ula ong ba ka jylla da kaba suk kan kynjoh ia ka thong kaba kala buh halor ka jingwan ki nongjngohkai na ka bynta une u snem.
“Ngi dei ban tam ia ka 1.7 million da kaba suk mynta u snem” ula ong.
Haba kylli halor katei ka tamasa, u Singh ula ong ba kum kine ki prokram ki kyntiew shuh shuh ia ka kam jngohkai hynrei la pynlong pat ia ki ha ka por ba ka jingwan tuid ki nongjngohkai ka jur bha.
“Baroh kine ki tamasa kiba la jia na ka por sha ka por ha ka por ba jur bha ka jingwan tuid ki nongwankai, kumta ki nongjngohkai ki ioh ia ka lad ban leit sha kitei ki prokram ban ialehkmen lang ha kitei ki prokram. Katei kala jia da kaba la long kumba lah pynkhreh lypa” ula ong.
“Kala wanrah ia ka jingmyntoi ha ka liang jong ka kam jngohkai hynrei tang kawei, ka long ba ngi dei ban peit lano u soh Cherry un phuh. Ngin ngin kham kmen shuh shuh lada ia kum kine ki tamasa la pynlong ha ki por ba duna bha ka jingwan tuid jongki nongjngohkai ha u Nailar bad Nailur. Kata kadei ka por kaba baroh ia kine kiei kiei kidei kiba lah ban pynlong” ula bynrap.
U Singh ula ong, ka jingpynlong ia ka tamasa ha Ri Bhoi district kala pynduna shibun ia ka jingmyntoi jong ki Hotel ha Shillong, namar bun ki nongwankai kiba na Assam kin jied ban leit sha Guwahati ha ka jaka ban leitphai sha Shillong.
“Namar ba ia ka Cherry Blossom Festival la pynlong ha ka thain Ri Bhoi, bun ki nongjngohkai na Assam kin ym wanphai biang sha Shillong ban pynlut shi kynta ha ka shong kali hynrei kin jied ban leit phai noh sha Guwahati, kaban shim por tang 1 kynta shiteng eiei nangtei. Kata kadei ka jingshah ktah jong ki Hotel haba pynlong ia kane ka tamasa ha Ri Bhoi. Ka jingiohnong ia ka Shillong bad ki jaka kiba marjan kan jur bha lada dei ba pynlong hapoh Shillong,” ula ong.

