Shillong, Iaiong 18 : Ka National Human Rights Commission (NHRC) kala phah notice sha ki Chief Secretary jong baroh ki Jylla ka Ri bad sha u Secretary ka Ministry of Social Justice & Empowerment ba pan ia ka kaiphod halor ka jingdon ki De-Addiction Centre.
Ka NHRC ka kwah ban tip haduh katno tylli ki De-addiction Centre ki don ha ki sorkar, la ki kynhun shimet ki lah ne em ban buh ia ki De-addiction Centre, la ka don ne em kano kano ka rule bala thaw hapoh ka NDPS Act ban teh kyndon ia ki De-addiction Centre kat kum ka kyndon 71 jong ka NDPS Act.
Ka NHRC kala pan jingtip ruh ia kitei ki lad ki lynti bala shim ha kaban ai jinghikai ia ki briew bala thungkam ha ki De-addiction Centre bad ban batai ia ki lad ki lynti ban tehlakam ia ki De-addiction Centre jong ki kynhun shimet kynthup naduh ka dork a mur, ka jingthungkam ia ki nongtrei, ki nongiasyllok, ki doktor, ki bam ba ai bad kiwei kiwei.
Kane kala mih hadien ba ka NHRC kala shim ia ka mukotduma suo moto halor ki khubor ba mih ha ki kot khubor halor ka jingiap jong uwei u nongdih drok ha kawei ka De-addiction Centre jong ka kynhun shimet, kaba dei ka jingjia ba lai ha ki por bala leit noh.
Uwei u samla ba 24 snem ka rta ula shah shoh ha ban da iap ha ki briew ba pyniaid ia ka De-addiction Centre ha Chandramni, Dehradoon, Uttarakhand, kaba la jia ha ka 10 tarik Iaiong, 2023.
Shuwa ia kane, ka Commission kala shim mukotduma suo moto halor ki artylli kiba kum kine ki jingjia hapoh ki De-addiction Centre ha Noida bad Ghaziabad, Uttar Pradesh. Ka NHRC kala pan kaiphod halor kine ki jingjia.
