Shillong, Iaiong 28: Ki bor khmih jongka Pynursla Civil Sub-Division kila pynbna ba la khang shipor ia ka surok Laitlyngkot-Lyngkyrdem na ka bynta ban ioh pynbeit bad pynmadan ia u lum kaban sdang naduh ka 28 tarik u Iaiong.
Ha ka jingpynbna paitbah kaba la pynmih hynne ka sngi Baar, u Additional Deputy Commissioner u Bah G Warjri ula ong, ba kane ka jingkhang kadei ha ka bynta jongka Laitlyngkot-Lyngkyrdem, Chainage Kms 24+00 haduh 37+00, ia kaba yn pyntreikam ha ki ar bynta ha ka shi sngi.
“Ha ka por mynstep naduh 10:30 haduh 3 baje mynsngi bad ha ka por mynmiet naduh ka por 9 baje mynmiet haduh 4 baje mynstep” la pynpaw ha ka jingpynbna.
Kane ka hukum kala mih hadien jong ka hukum kaba la pynmih ha ka 27 tarik u Lber bad 21 tarik u Iaiong 2026 hadien ba kala don ka jingiaid shakhmat ha kaban pynmadan ia u lum da ka EPC Contractor jongka NHIDCL, la bynrap.
Ki bor pyniaid kila pyntip ba kane ka jingkhang surok kan long kaba tang shipor bad kaba man la ka sngi naduh ka 28 tarik u Iaiong bad kan iai bteng tad haduh ban da pynbna da kumwei pat.
“La shah ia ki kali ban iaid ha baroh arliang (nuksa. Lyngkyrdem & Laitlyngkot) hashwa ka por 10:30 mynstep bad hadien kane yn sa sdang biang ia ki kam pyntrei da ka kompani ha shi lynter jong katei ka surok” la ong ka jingpynbna.
Da ka jingsdang ruh ban wan ka aiom Lyiur, la kyntu ia ki paitbah ba kin long kiba phikir.
“Namar ka jingsdang wan ka aiom lyiur, baroh ki nongleit nongwan bad ki paitbah la bthah tyngeh ba kin long kiba da phikir bha haba ki iaid lyngba katei ka jaka bad ban kiar ban leit haba kam long kaba da donkam than ne mar ia dep slap jur bad ruh ha ka por mynmiet” kala ong.
La pynbiang ruh ia kano kano ka jingdonkam ban iaid ki kali kit nongpang ha ka kynta ba khang iaid na katei ka surok. Na ka bynta ka jingiatreilang bad ka kompani kaba pyntrei ia ka kam, ki paitbah ki lah ban phone ha Pynursla Police Station ha u nombar t 6909217154, la ong ka notis.
