Shillong, Risaw 13: U Myntri ka tnat Sports and Youth Affairs Bah Wailadmiki Shylla u la pynbna ba ka Sorkar jylla kan bei lut ia baroh ki jinglut jingsep ban leh passport na ka bynta ki samla kiba shah jied ban leit shabar ri hapoh ka Chief Minister’s Youth Engagement Programme, ha ryngkat ka jingiarap pisa.
Haba kren ha ka jingïalang plie iaka 2nd State-Level Chief Minister’s Youth Engagement Programme (CMYEP) 2026 ha Lariti Performing Centre, Mawkasiang, Shillong, u bah Wailad u la ong haki snem ban wan ka Sorkar kan pynthikna ruh ba ki samla ba duna dkhot met kin ioh ban shim bynta.
“Da kaba don 52 percent ki nongshong shnong jong ka Meghalaya kiba hapoh ka rta kaba 20 snem, ka sorkar jylla ka la pynkiew iaka mang tyngka haka tnat Sports na ka T. 30-40 klur sha palat T. 840 klur,” la ong u Bah Wailad.
“Ka Meghalaya ka dei tang ma ka ka jylla ha ka ri kaba ngi don ia ka prokram youth engagement naduh ka kyrdan jong ki block,” u la ong bad bynrap ba mynta u snem kila don kumba 14,000 ngut ki samla kiba wan iashim bynta ha baroh ki 56 tylli ki C&RD block.
Haba iathuh ia ka jingleit shim bynta jong u haka youth exchange program sha Japan, u Bah Wailad u la ong ba iaka kynhun ki ban leit sha Philippines bad sha kiwei ki ri yn kyrshan pura da ka sorkar.
“Nga sngewnguh shibun eh ia u Myntri Rangbah ka Jylla jong ngi uba la buh shisha ia ki samla jong ka jylla hakhmat eh” u la ong, da kaba ai khublei ia u Myntri Rangbah ka Jylla Conrad K Sangma uba la kyrshan ia kane ka jingthmu ban kyrshan iaki samla ba leit shaka Youth exchange program ha bar ri.
U Director ka tnat Sports and Youth Affairs u Bah Alertson Nongbri u la ong ba kane ka prokram “Young Meghalaya, Shaping Tomorrow”, ka pyniar shaki shnong ki thaw bad kan prat lynti iaki samla ban ioh jingithuh haka kyrdan jong ka Jylla, National bad International.
U la ong ba ka program ba san sngi kan don bynta bad ka Nasha Mukt Yuva, ki jingiasam jingtip halor artificial intelligence, ka jingkylla ka suinbneng bad ka jingtei ia ka jaitbynriew, ki jingpyni ia ki jingstad saian, ki jingrwai tynrai bad ki jingialehkai ban ban pynroi ia ka jinglah ban shaniah ha lade bad ka jinglong nongialam.
Ïa kane ka jingïalang sdang da ka jingshad da ka Shelevah N Jyrwa, kaba dang pynkhreh ban iakhun haka Britain’s Got Talent, bad ka jingrwai naka “Kawei Ka Sur.”
Ki nongïashim haka youth exchange program kham mynshwa kata ka Wanmi R Makdoh bad u Twinklexilingshi Lyngdoh ki la ïathuh halor ki jingiakon kiba la wan shim bynta ha Malaysia.
Ka Wanmi ka la mihkhmat ïa ka Meghalaya ha ka Ïingdorbar Parliament jong ka ri India.
La pynlong da ka Directorate of Sports and Youth Affairs, ka CMYEP ka long kum ka lynti jong ka jingpynroi iaka sap jong ki samla kaba thmu ban tei bad pyn khlaiñ ym tang kum ki nongïashim bynta hynrei kum ki nongtei ba kongsan jong ka lawei kaba kiew shaphrang bad kaba lah ban shaniah ha lade.
Haka sngi kaba 3 kan don ki jingïalehkai adventure ha ka Lumparing Adventure Camp, ka inter-district quiz, ka jingdro dur, ka poitri, ka jingiakob rwai, jingiakob tem guitar bad ki jingrwai tynrai jong ki kynhun.
Haka sngi kaba 4 kan don ka Science Exhibition cum Mela, ka jingiakob tan tyllai, bad ka talent show.
