Ka High-Speed Corridor kan kyntiew bha ia ka ioh ka kot ka Meghalaya : Tynsong

Shillong, Iaiong 28 : U Symbud Myntri Rangbah ba khmih ia ka Tnad PWD (Roads) Bah Prestone Tynsong ha ka sngi Ba-ar, ula ong ba ka High Speed Corridor Project kan iarap ban kyntiew bha ia ki kam ba iadei bad ka ioh ka kot ha Meghalaya da kaba nang bun ka leit ka wan ki kali lyngba ka Jylla, ia kaba u ong ba kan dei ka ‘main transit state’ ha ka thain.

Haba kren sha ki lad pathai khubor halor ka jingiaid ka project, u Bah Prestone ula ong “Ia ka package-I bad II, lah dep ban khot tender bad ha Ri-Bhoi District, ka kam jaka ka dei kaba lah dep ban pynbeit bad ka jingpyniaid lynti ia ka surok ruh lah dep ban leh hynrei ngi don satang katto katne ki bynta ha East Jaintia Hills kiba dang iaid ha ka jingiakren”.

U pynpaw ba kane ka expressway kan iarap bha ban pynduna ia ka jingbam por ha ka leit ka wan.

“Haba ngi kren halor ka express way, phin sngewthuh ba ha ka jaka ban bampor 3 kynta ha ka leit ka wan, ka lynti kala kham lyngkot bad phin sa sngewthuh haduh katno kynta kan duna” ula ong.

Haba khot ia ka kum ka economic corridor, u Bah Prestone ula ong “Kane ka dei ruh ka economic corridor, kaba nga ruh nga sgew ba lada ngi pyndep ia ka project, ka jingiaid ki kali kan bun bha bad ka Meghalaya kan dei ka main transit state, ne ka jylla ba iaid bha ki kali, bad ki kam ban kamai ruh kan buh bah”.

Haba kylli ba balei ia kane ka corridor ym shna kum ka 6-lane expressway, u Bah Prestone ula pynpaw ia ka jinglong ki jaka hapoh ka Jylla.

U Bh Prestone u iathuh ba ka Sorkar ka don jingthmu ruh ban shna ia ka surok 4-lane na Umiam-Shillong kaba lah dep ban pynkhamti sha ka National Highway Infrastructure Development Corporation Ltd (NHIDCL).

“Ngi la dep bynshet ha ka NHIDCL. Ngi la shim ia ka rai na ka Sorkar Jylla ba ngin shna ia ka surok 4-lane na lad Umiam lane Lad Umroi haduh ha Shillong” ula ong.