Shillong, Risaw 14: Ka Chief Justice jong ka Meghalaya High Court bad Patron-in-Chief ka MSLSA Justice Revati Mohite Dere, ha ka sngi Balang, kala ong bun ki khynnah kim tip eiei shaphang kaei kaban jia ia ki lada jia ba ki leh ia kino kino ki kam kynshleiñ ia ki khynnah kiba dang hapoh ka 18 snem ka rta, haba plie ia ka Project ‘Ka Jingkyrmen (Hope)’ for child safety.
“Bun ki khynnah kim don jingtip satia, ia kaei kaba kin shah pynngat ha ki kyndon aiñ lada ki donkti ha kaban leh ia kino kino ki kam kynshleiñ bad kino kino ki khynnah kiba dang hapoh ka 18 snem ka rta” ong ka Justice Dere bad ka bynrap, ba hapoh jong ka POCSO Act, ka jingai jingmynjur ki khynnah kiba dang hapoh ka 18 snem ka rta kam long kaba shongaiñ bad kane ka jingleh bakla kan khring ia ka jingshah pynshitom kaba tyngeh.
Ka Meghalaya State Legal Services Authority bad District Legal Services Authority, East Khasi Hills, ryngkat ka jingiatreilang bad ka Sorkar Meghalaya, kila sdang ia kane ka sienjam ban pyrkhing ia ka jingleh ia ki kam thombor ia ki khynnah, ban kyntiew ia ka jingpynsngewthuh ia ki aiñ ki kanun bad ban pynkhlain ia ki lad ban ai jingiada hapoh jong ka POCSO Act, 2012.
Ka Chief Justice kala ong, ba ka project kadei kaba la pynwandur ha kaba iadei bad ki jingjia ha ka jingtian bishar, khamtam eh na ka bynta kito ki khynnah kiba iadonbynta ha ka kam ia iaid ne ia ieid samla.
“Kum kitei ki jingjia ki lah ban ktah jur bha, kynthup ia ka jingieh noh shiteng por ia ki jingpule ha skul, jingpun khun, jingshah kem bad jingshah pynsajia, kaban ktah jur bha ia ka lawei jong baroh arngut ka kynthei bad u shynrang” kala ong.
Kala banjur ba ka pule puthi kadei ka jingpynkup bor bad kala pynshlur ia ki khynnah ban kidei ban pynleit jingmut bad ban pyndep ia ka jingpule bad ban bteng ban beh sha kaban pynurlong ia la ka jingangnud.
U Justice H S Thangkhiew, Judge jongka High Court bad u Executive Chairman ka MSLSA, ula ong, ba ia kane ka project la pynwandur hapoh ka jingbthah jong ka Chief Justice ban pynkhlain ia ka jingpynsngewthuh paitbah khamtam eh na ka bynta kito ki khynnah kiba don jingma.
Ula banjur ia ka jingdonkam ban pynsaphriang ia ki jingtip kiba iadei bad ki aiñ ki kanun ha ki ktien kaba ki khynnah bad ki nongshong shnong kin lah ban sngewthuh bad ban pynlong ia kane ka sienjam kaban treikam bad kaban ioh da baroh.
U Commissioner and Secretary ka Tnad Social Welfare u Pravin Bakshi, ula pdiang ia katei ka sienjam bad ka ong, ba ka long kaba kongsan bha ban pynkhlain ia ka jingai jingiada ia ki khynnah.
Ula kdew ba ka jinglong jingman na ki jingjia hapoh jong ka POCSO ki don 29 tylli ha Mawlai Block bad 26 tylli ha Mawryngkneng Block kaba banjur ia ka jingdonkam ban pynlong ia ka jingpynsngewthuh paitbah kaba iaineh.
Ula pyntip ruh ba ka jingpyniasoh ia ka Child Helpline bad ka Emergency Response Support System 112 bad ka Women Helpline 181.
Project Ka Jingkyrmen kadei kaba pyrshang ban pynsngewthuh ia ki khynnah, ki kmie ki kpa, ki nonghikai, ki shnong ki thaw halor ka jingshngain jong ki khynnah, ki hok katkum ki aiñ ki kanun, ka rukom ktah kaba bha bad ka jingktah kaba sniew, ka jingai jingmynjur bad ki jingshngain ha ka jingpyndonkam ia ki kor digital ban lait na kino kino ki jingma haba leh Online.
Kin pynsaphriang ruh ia ki jingtip halor ki Helpline Numbers — Legal Services Helpline 15100, Cyber Crime Helpline 1930 bad Police Emergency Helpline 112 bad ban kynthuplang ia ka jingiatreilang hapdeng ka Tnad Social Welfare, Health, Education, Police, bor District, nonghikai, khynnah pule, Nongtrei Anganwadi, Para-Legal Volunteers bad ki Dorbar Shnong.
Kane ka sienjam ka thmu ruh ban iada ia ka jingieh noh ia ki skul da kaba kyntiew ia ka jingbtin bad jingiasyllok bad ka jingioh ia ki lad ban ioh ia ki jingkyrshan.
Lyngba kane ka project, ka MSLSA, DLSA East Khasi Hills bad ka Sorkar Jylla ki iengskhem ha ka jingkular ban iada ia ki khynnah na kano kano ka jingshah thombor bad man la ki khynnah kin heh kin san da ka burom, jingshngain bad ka jingioh ia kiba bun ki lad bad ki kabu.
