Shillong, Risaw 14 : Ka Meghalaya Police Football Team (MLP FT), ka la sei ia ka khubor kaba pynkyndit ia u paidbah ba ieit bad ba sngewtynnad ia ka phutbol, bad kane ka la wan hadien ba ka la lah ba kan pynliem ia ka Langsning FC lyngba ka tie breaker kaba long da 5-4, ha ka jingiakhun ia ka Playoff kaba ar jong ka lympung ialehkai SSA Super Cup, hynne ka ka sngi Balang ha SSA Stadium, Polo.
Ka Langsning FC ka la ioh ba kan pynkhih nyngkong ia ka jar ha ka kylla step, kaba la wan lyngba u Wadajied Kynsai Ryngkhlem ha ka minit ba 17, ia kaba na ka liang ka MLP FT pat ka la lah ban pynphai kylla ha ka kylla miet lyngba u Rapborlang Marwein ha ka minit ba 67.
Haduh ba kut ka 90 minit bad ka 30 minit ba la pynjlan (extra time), ka jingiakhun hapdeng kine ki ar kynhun ka la iai neh sah ha ka jingiakhaid kaba long da mar shi kol, bad ym shym la don shuh mano mano ba lah ban ioh pynkhih ia ka jar.
Haba la rah sha ka tie breaker ha ki lai sien shut kiba sdang, ki ar kynhun ki la lah ban ioh pynkhih ia ka jar.
Da kane ka result, ka MLP FT bala ioh rung sha ka semifinal bad kan hap iakhun pyrshah ia ka Shillong Lajong FC la sngi Saitjain.
