Imphal, Risaw 13: Ki Pulit ka Manipur ki la kem ïa 13 ngut ki briew, kynthup ïa uwei u khynnah uba ïaleh pyrshah ïa ka aiñ (CCL), halor ka jingkynnoh ba ki la pynsaphriang bad pynmih pisa na ki video bad ki dur ba sniew jong ki kynthei trai shnong khlem ka jingmynjur lyngba ki Telegram channel. Ka jingtohkit ka kynthup ruh ia ka jingkynnoh ba la pynphriang ia ki video ba shah leh khlemakor ki khynnah.
Ki pulit ki la ujor FIR ha Moirang Police Station hadien ba ki la ioh ia ka jingtip ba ki nongpyniaid bad ki nongpyndonkam ia ki Telegram kiba bun ki donkti ha kaba pynphriang, khaii bad kamai pisa ia kitei ki tiar.Hadien kata la sdang ïa ka jingtohkit, kaba la ai kyrteng code da ka Operation Dignity.
Katkum ki pulit, haduh mynta ka sngi la kem haduh 13 ngut ki riew shimet. Ki nongtohkit ki la ioh ban kurup 14 tylli ki mobile phone bad kawei ka laptop kum shi bynta ban tohkit.
Ki briew kiba la shah kem ki kynthup ïa N. Rajesh Singh uba la sin kyrteng kum u Maipakchao, 21 snem ka rta na Bishnupur, H. Dhanajit Singh uba la sin kyrteng kum u Taison, 19 snem ka rta uba na Bishnupur, S. Saphaba Singh, 19 snem ka rta na Imphal West; Th. Cavendish Singh uba la sin kyrteng kum u Ingocha, 21 snem ka rta na Kakching, H. Rojit Singh, 19 snem ka rta na Bishnupur; M. Clinton Singh, 28 snem ka rta na Bishnupur; u Kh. Bipin Singh, 31 snem ka rta, uba na Thoubal.
Kiwei pat kina la shah kem lang ki kynthup S. Simpson Singh, 34, na Imphal West; A. Aria Singh, 24, na Bishnupur; S. Alexander Singh, 31, na Kakching; K. Rakesh Singh, 18, na Imphal West; nad Ch. Robert Singh, 27, na Imphal West. Uwei pat u nongshah kynnoh u dei u khynnah uba ialeh pyrshah ia ka ain, ia uba ym shym la pynpaw ia ka jinglong bad kyrteng jong u.
Ki pulit ki la ong ba ka jingtohkit ka dang ïaid shakhmat ban lap ïa ka network kaba kham heh kiba donkti ha ki kam ba la kynnoh, ban wad ïa ki jingpynïaid pisa kiba ïadei bad ka jingpynlong pisa ïa ki jingthoh bad ban lap ïa kiwei pat ki lanot.
