Shillong, Risaw 13 : Ka jingpynjlan ïa ka samoi treikam jong ka Garo Hills Autonomous District Council (GHADC) ka dei kaba la leh da ka jingthmu ban pyndep ïa ki kam bad ki jingdonkam kiba hap ban pynbeit shwa ban pynlong ïa ka elekshon, long u Myntri Rangbah ka Meghalaya Conrad K. Sangma, ha ka Sngi Ba-ar.
Ka Kynhun Myntri ha ka 7 tarik Risaw kala rai ban pynjlan ia ka samoi treikam ka GHADC da hynriew bnai.
Haba pynshai ia kane ka rai, u Conrad ula ong ba ka Sorkar ka thmu ban pynlong ia ka elekshon hashuwa ban kut ka samoi treikam ba la pynjlan.
U iathuh ba ia ka jingpynbeit ryntih ia ki constituency ym shym la lah ban pyndep khlem ka Separate Electoral Roll (SER) bala mynjur da u Lat ka Jylla.
“Ka jingpynbeit ryntih ia ki constituency ka dei kaba bunkam bha kaba donkam ban pynrung lang ia ka electoral roll bala pynkhreh kyrpang la ka jong. Lada leh ia ka jingpynbeit constituency khlem ma ka, baroh kiei kiei kila long da kumwei pat” ula ong.
Ia ka SER la mynjur da u Lat ka Jylla kumba 10 sngi mynta, bad hadien kane ka Delimitation Committee kala pyniaid shakhmat ia ka kam ba khatduh, ula ong.
“Ai ba ngan kren shai sha ki nongshongshnong, khamtam ha ri-lum Garo ba kane ka dei ka kam kaba donkam. Ngim shym la pyrshang ban pynslem ia ka elekshon. Ym lah ban pynlong ia ka elekshon khlem ka jingpynbeit ryntih ia ki constituency bad ka jingpynbeit ryntih ia ki constituency kan ym dep khlem ka SER” ong u Conrad.
“Mynta ba ka SER kala de[, ka jingpynbeit ryntih ia ki constituency ruh kan sa dep noh. Ia ka electoral roll yn sa pynmih noh bad ia ka elekshon ruh yn sa pynlong. Ngi ngeit skhem ban pyndep ia kine kiei kiei baroh hapoh ka hynriew bnai bad ban pynlong kloi noh ai ka elekshon” ula bynrap.
