Shillong, Risaw 13 : Ka Kynhun Myntri ka Sorkar Jylla ha ka sngi Ba-ar kala rai ban pyndam noh ia ka ram ba palat T.24 klur bala shah da ka Mawmluh Cherra Cement Limited (MCCL) sha ka Sorkar Jylla, kaba pynkhuid syndon war ia ki kam baroh ban khang dam ia ka kompani.
U Myntri Rangbah Conrad K Sangma ula pyntip sha ki nongthoh khubor ba ka pisa ba pynsah ka kynthup ia T.8.9 klur ka sales tax bad T.15.53 klur ka khajna ba dang hap siew ka MCCL.
Ula ong ba ka rai ban khang dam ia ka kompani ka dei kaba la shim la slem bha bad baroh ki jingsiew sha ki nongtrei lah dep ban pynkhuid, ka pisa ba dang sah ban ioh ka Sorkar kala khang lynti ia ka jingkhangdam ba pura.
“Kine ki dei ki ram ba dang pynsah ha ki kot ki sla ka MCCL bad ngim lah ban khang bad pynkut ia ka kompani khlem da pynkhuid ia kine ki pisa ba sah” ong u Conrad.
Ula ong ba ka rai ka kynhun Myntri ban pyndam noh ia ka pisa ka dei tang ka jingpynbeit ia ki kot ki sla.
“Naba ka MCCL ka dei ka kompani ba long trai ka Sorkar, ka Sorkar Jylla kan hap ban siew ia ka MCCL bad ka MCCL kan hap siew biang sha ki Tnad. Kan iaid pyllun pyllun. Ban kiar ia ka jingpyn syrwa ia ka por bad ka jingpynbun kam, ngi la rai ban pyndam noh ia kane ka ram. Kam don satia kano kano ka jingktah ia ka pla tyngka” ula ong.
