Shillong Nailar 27: Ka Meghalaya Gymnastics Association hynne ka sngi kala pynkup burom ia ki khynnah kiba ialehkai Gymnastic kiba la wanrah nam bad burom iaka jylla ha ka jingjop iaka “Invitational Gymnastics Championship ” kaba la long ha Khuman Lampak Indoor Stadium haka 19 bad 20 tarik mynta u bnai kaba la pynlong da ka Manipur Gymnastics Parents Association.
Ki khynnah kiba la jop ha katei ka jingiakob ki kynthup ia ka Josephine Isabel Warjri (under 17) kaba la ioh iaka Takma Rupa haka Vaulting Horse. U Bakmenhun Shangpliang (under 12) uba la ioh iaka Takma Rnong haka Balancing Beam bad Floor Exercise.
Kiwei kiwei ki khynnah kiba leit iashimbynta ki kynthup ia ka Sa-I-bakor K. Tariang, Athilia Susngi, Wansaphi Bernadette Malngiang bad Wansuk Mery Susngi.
Kadei ka sien kaba nyngkong haka histori jong ka Meghalaya Gymnastics Association naduh ba la seng ia ka ha u snem 1997 ba kitei ki nongleh Gymnastic kin jop ha ka jingiakob shabar jong ka jylla.
Ka long ruh ka sien kaba nyngkong ba ka nongialehkai Gymnastic barim ka jylla ka Kong Lucy Mary Malngiang kala shah jied ban long kum ka nongbishar haka Women’s Artistic Gymnastics bad Aerobic Gymnastics.
U Bah Sebastian Swett, Vice President MSOA, kum u Kongsan u la iaroh bad ai mynsiem ia kitei ki khynnah bad heprit ba kin bteng ban trei shitom ban wanrah nam bad burom iaka jylla.
Ha katei ka jingialang la iadonlang u J.R Marak, Working President ka MGA, Bah Ezra Malngiang u Vice President ka MGA, ki dkhot ka MGA, ki kmie ki kpa, ki bahaiing bahsem bad kiwei kiwei.
Ia katei ka jingialang la pyniaid da ka Kong Rida Lyndem kaba long ka Joint Secretary ka MGA.
Ki nongialehkai Gymnastic ka jylla kila lah ban lehkai bha watla kim pat biang iaka jaka ialehkai, ka jingioh jinghikai kaba biang bad kiwei kiwei ki jingdonkam.
Ka MGA ka donkam iaka jingkyrshan na ka sorkar ban tei iaka gymnastics hall kaba kyrpang bad ban don ia u Coach, khnang ba yn lah ban ai jinghikai bad ban pynkhreh iaki nongialehkai ban iashimbynta ha ki jingiakob hapoh ri bad shabar ri .
