Shillong, Nailar 27 : Ka kynhun ialehkai jong ka Ryntih ka la ioh ban pynliem haduh 2-0 kol ia ka Nangkiew Irat ha ka lympung ialehkai jong ka Shillong Premier League kaba long ha kane ka sngi Saitjaiñ ha madan Third Ground Polo.
Ia kitei ki ar kol jong ka Ryntih la ioh ban thep baroh ar da u Sheen Sohktung ha ka minit kaba 25 jong ka kylla step bad kawei pat ha ka minit kaba 81 jong ka kylla miet.
Da katei ka jingjop mynta, ka Ryntih kan dang neh hi ha ka kyrdan kaba saw da ki 17 point bad ka Nangkiew Irat ruh kan dang neh ha kajuh ka kyrdan kata ha ka kyrdan kaba 5 da ki 13 point.
Haba phai sha ka jingiakhun, baroh arliang ki la ialehkai bha hynrei ka jingbym lah jong ki rang thep kol ka Nangkiew Irat ban pynkhih ka la pynlong ia ka Ryntih ban ioh kabu ban khur suk ei ia ki lai point ha kane ka sngi.
Ka jingiakhun kaba bud pat kan long ha ka 31 tarik mynta u bnai ha pdeng ka Langsning bad ka Shillong Lajong ha ka por 3:45 PM. Ka Langsning ka don mynta ha ka kyrdan kaba ar da ki 18 point katba ka Shillong Lajong pat ka don ha ka kyrdan kaba 6 da ki 11 point.
Watla ka Langsning ka jop ruh kan ym pat lah ban tam ia ka Mawlai kaba la ioh ban tam mynta haduh 8 point ha ka kyrdan kaba hakhlieh duh katba ka Shillong Lajong lada ka jop kan knieh ia ka jaka jong ka Nangkiew Irat ha ka kyrdan kaba san.
