Shillong, Nailar 27 : Ka sorkar jylla ka la pyntip ba shen ki nongshong shnong kiba donkam ban iaid man ka sngi lyngba ka surok Shillong -Dawki kin sa lait noh na ki surok thliew bad ki surok sniew namar shen ka jingmaramot kan sdang noh.
Haba pyntip ia kane, u Myntri ha ka Sorkar Jylla Bah Hamlet Dohling u la ong ba hadien ba u la thoh sha ka NHIDCL halor katei ka jingsniew palat ka surok u la ioh ia ka jubab ba ki la dep aiti ha ka kompeni M/S Tanor Engineering kaba na Arunachal Pradesh ban maramot ia katei ka surok.
U la ong ruh ba hadien ba la dep maramot ia katei ka surok ki paidbah kin sa lait noh na ka jingsahkut kali kaba ju mih na ka jingsniew palat ka surok katba ka jingpyntrei ia ka Four lane kam pat dep.
U tei u Myntri u la pyntip ruh ba la mang haduh 5.15 klur tyngka ban maramot ia kitei ki surok sniew baroh da kaba sdang naduh Rilbong ter ter shaduh katei ka jaka. U la iathuh ruh katei ka kompeni naduh ka taiew ban wan kin sa sdang noh ia ka kam.
