Shillong, Nailar 27 : Da ka thong ban pynmih pisa na ka bynta ka projek ba iadei bad ka imlang sahlang, ka Jingiaseng Kynthei KJP Synod Sepngi ryngkat ka jingiatrei lang bad ka Mawkhar SC, ka la pynlong ia ka jingialehkai futsal kaba lai sngi hapdeng ki Presbytery bapher bapher ha madan Student, Jaiaw ha kaba ka Shiparalok-Jingiaseng Kynthei Mairang Presbytery ka la ioh ban rah ia ka nam lahduh.
Katei ka kynhun lahduh ka la ioh ban pynliem noh ia ka Jingiaseng Kynthei Rambrai Presbytery da ka 6- 2 kol ha ka final kaba shongshit bha bad ioh ban khru ia ka song pisa kaba haduh 35,000 tyngka katba ka kynhun ba wan ba ar pat ka ioh ban khur ia ka song pisa kaba 15,000 tyngka ryngkat ki khusnam.
Ha kane ka sngi la donlang ruh u MP jong ka Shillong Bah Vincent H Pala kum u Kongsan bad u President jong ka Mawkhar SC pat, Bah Ransom Sutnga kum u Symbud Kongsan.
Lyngba katei ka lympung ialehkai ka pisa kaba mih, na ka liang ka Jingiaseng Kynthei KJP Synod Sepngi kan tei ia ka Counselling Centre ha Shillong, ka skul ha Umsaitjain bad ha Assam Mission.
Baroh ki la don haduh 32 tylli ki kynhun kiba wan ban shim bynta naduh ka sngi ba sdang ha kane ka sngi Palei ha kaba u MLA ka North Shillong Bah Adelbert Nongrum u la wan ban plie ia ka kum u Kongsan.
