Shillong, Lber 23 : Ka Sorkar Meghalaya Democratic Alliance-2 ha ka sien ba nyngkong eh kala wanrah ia ka mang tyngka ba kynthup ia ka jingmang pisa sha ka jingiakhun ban tehlakam ia ka jingpynjot ia ka mariang
Ha ka jingkren maitphang ia ka mang tyngka, u Myntri Rangbah ka Jylla Conrad K Sangma ula ong ba ka Sorkar Jylla kala shimkhia ia ka jingkongsan ka kam iada ia ka mariang.
Ka jingmang pisa sha ki kam iada mariang na ka bynta u snem 2023-2024 ka long T. 3,412 klur kaba long kumba 15% na ka mang tyngka ka Jylla, ula bynrap.
U Conrad ula ong ba mei mariang jong ka Jylla Meghalaya ka dei kaba suk palat ban pynjot bad ka kamai ka kajih jong ki lak ngut ki nongshongshnong ka Jylla ka shaniah tylli ha ka mariang. Namar kata,ka jingpynleit jingmut ha ki kam iada mariang ka long kaba kongsan bha ia ka jingkiew shakhmat ka Jylla.
U pyntip ba ka Jylla kala pyntreikam ia ka State Water Mission ha kaba la lah ban wanrah ia ka Water Management ne ka jingtynkai haba pyndonkam ia ka umbam umdih.
“Ka Jylla kala pyntreikam mynta ia ki project ba bei pisa na shabar kaba kot haduh T. 2,500 klur, kaba la mang thik sha ki kam iada mariang, pynneh pynsah ia ki khlaw ki btap bad ki jaka tan um (harvesting)” ong u Conrad haba pyntip ba ka Sorkar kan sa shna ia ki jaka pyllang um ha ki 300 tylli ki jaka ha ka jingpynlut ba T. 250 klur hapdeng u snem 2023-2024.
Pule lang ia kane: Wanrah u CM ia ka mang tyngka ba duna T. 1,592 klur jong u snem 2023-2024
Haba pynpaw ba ka Meghalaya kan ialam ia ka lynti ha kaban pyntreikam ia ki project ban iada ia ki khlaw, u Myntri Rangbah ula ong ba kumba 88 lak tynrai ki dieng la dep ban thung ha kine ki san snem bala leit noh ba kin pynkylla khlaw ia ka jaka ba 10,000 hectare.
Ula ong ruh ba ka Sorkar kala pyntreikam ia ka project ba hehduh hapoh ka Ri ka “Payment for Ecosystem Services’ bala khot ka Green Meghalaya. Hapoh kane ka prokram, ki shnong ki thaw kin ioh ia ki song pisa ban pynneh pynsah ia ki khlaw.
“Ia mynta ngi la lah ban iada kumba 16,000 hectare ka khlaw bad ngi la dep sam palat T. 13 klur ha une u snem mang tyngka ba mynta” ula ong.
U Conrad ula pynbna ruh ba kumba 50,000 hectare ki jaka khlaw kin ioh jingiada na kane ka prokram bad T. 250 klur yn sa ai sha ki Shnong ki thaw ha kine ki san snem ban wan.
