Shillong, Lber 23 : U Myntri Rangbah ka Jylla Conrad K Sangma ula ong ba ka Sorkar Jylla khlem pep kan wad ia ki lad ki lynti ban ioh seng noh iala ka jong ka Cancer Hospital ba pura hapoh ka Jylla.
“Khlem pep, lada mih ka jingdonkam bad haba pynshong nongrim na ka jingdon pisa bad kiwei kiwei, ngin sa wad ia ki lad ki lynti ban ioh noh ia ka Cancer Hospital ba pura lada donkam” ong u Conrad haba iakren bad ki nongthoh khubor hadien ba dep wanrah ia ka mang tyngka hynne ka sngi Palei.
Hynrei ula pyntip ba ka Sorkar ka don jingthmu ban pyniar bad kyntiew kyrdan ia ka Cancer Wing bad baroh ki jingshakri jong ka.
Haba pynpaw ba kam dei satia tang ka kam ai jingsumar, u Myntri Rangbah ula ong “Ka don shibun ka kam ban leh haba iadei bad ka jingpeit bniah (screening) bad ban shem kloi ia ka jingpang bad ban iada. Namar kata, ka Meghalaya kala iaid ha ka lynti ka ban pyrkhat kyllum lang ia kine kiei kiei baroh. Ngi la phaikhmat bha mynta sha ka jingleh screening (peitbniah) khnang ba ngin shem kloi ia kiba pang bad ba ngin lah iada ia ki mynsiem briew”.
Pule lang ia kane: Wanrah ka Sorkar MDA-2 ia ka mang tyngka ba kynthup ia ka jingiada mariang
Haba kren halor ka mang tyngka, u Conrad ula ong ba ka Cancer Wing ba 90 jingthiah ha Shillong Civil Hospital kala treikam mynta u snem mang tyngka.
Ka Tnad kan sa pyndait ruh ia ka radio oncology system hashuwa ban kut u 2023 kum ka jingpynkiew kyrdan ia ka jing shakri ha ka jingiakhun pyrshah ia ka jingpang cancer (bampong).
Ula pynbna ruh ba ka Sorkar Jylla kan sa pynkha ia ka Cancer Wing ha Tura Civil Hospital.
U Myntri Rangbah ula pyntip ba ka Sorkar kala shimkhia ruh ban kyntiew kyrdan ia ki jingtei jong baroh ki jaka sumar kaba sdang naduh ki jaka sumar ba don hapoh ka Nongbah shaduh ki Sub Centre.
Ka Sorkar kala dep ban tei ia ka Mother and Child Hospital ha Jowai bad ka hospital 100 jingthiah ha Mawkyrwat, ula ong haba bynrap ba ka jingtei thymmai ia ki 19 tylli ki jaka sumar kila dep hala ki bynta ki bynta.
Ula bynrap ruh ba ka Sorkar kan sa pyndep noh hapoh u 2024 ia ka Integrated Health Complex ba 100 jingthiah ha Baljek, West Garo Hills katba ia ka Tura Maternity and Child Hospital ba 50 jingthiah , yn kyntiew kyrdan sha ka 100 jingthiah hapdeng u 2023-2024.
Ula ong ba ka jingshna ia ki 78 tylli ki sub centre ba thymmai kin sa dep noh haba kut jong u 2023 ha ka jingpynlut ba kot T. 43 klur. Nalor kane, ka Sorkar kan sa tei ruh ia 31 tylli ki Urban Health Centre ba thymmai ha une u snem mang tyngka ban wan.
Ha kajuh ka por, ka Sorkar kala rai ban kyntiew kyrdan ia 20 tylli napdeng ki 31 tylli ki Community Health Centre kum ki Referal Unit hapdeng u snem 2023-2024.
“Ban pynkhlain ia kine ki jaka sumar, ngi la ai jinghikai pyntbit ia ki doktor mynta” bynrap u Conrad.
