Shillong, Lber 23 : U Myntri Rangbah ka Jylla Conrad K Sangma hynne ka sngi Palei, ula ong ba ka jingiakren kala iaid shakhmat ha kaban tei ia ka Shillong Medical College da ka Public Private Partnership (PPP) mode.
“Ka jingiakren kala iaid bad nga kyrmen ba hapoh une u snem ba mynta, ngin sa iohi ia u soh” ong u Conrad haba iakren bad ki nongthoh khubor hadien ba dep wanrah ia ka mang tyngka hapoh ka Iingdorbar Thaw Ain.
U Conrad ula ong ba kane ka long hadien ba ka Sorkar kala pynduh pyndam noh ia ka MoU bala iasoi bad ka kompani bala iateh nyngkong, ba kan pynieng ia ka Shillong Medical College, hadien ba kam shym la iaid satia ka kam wat hadien 10 snem.
Pule lang ia kane: CM : Ka Sorkar kan wad lad ban seng ia ka Cancer Hospital ba pura ha Jylla
“Hadien ba ngi la pynduh pyndam, ngi lah wad ia ki lad ki lynti, iakren ia ki kompani bapher bapher bad ki hospital shimet ba kin wan iatreilang bad ngi…ki don uwei ne ar ngut ki briew kiba la wan iakren bad kila pan ei ia katto katne ka jaka ba kin pynieng ia ka hospital bad ka Medical College bad kin ai sha ngi ia katto katne ki seat sha ka Sorkar Jylla” ula ong.
“Wat mynta ngi dang iakren bad ki bad nga kyrmen ba da kane ka Sorkar thymmai bad Myntri thymmai, ngin iai buddien ia kane ka kam sa shisien” bynrap u Conrad.
U Myntri Rangbah ula pyntip ruh ba ka Sorkar kala dep ban ithuh ia ka jaka ba 50 acre ha New Shillong Township na ka bynta ban tei ia ka Medical College.
Haba kylli, u Conrad ula ong “Na ka liang ka Sorkar, ban pyniaid ia ka college ka dei ka kam ka ban buh jingtynjuh bad namar kata, ngi sngew ba ka PPP mode ka dei kaba biang eh bad kaba iahap bha namar ngi donkam ym tang ban shu tei ia ka hynrei ban pyniaid beit iaid ryntih ruh ia ka ha ka lynti kaba dei”.
Haba wanrah ia ka mang tyngka, u Conrad ula ong ba ka Sorkar Jylla kala kut jingmut ban wanrah ia ka Medical College hapoh ka Jylla.
Ula pyntip ba ka jingpyntrei ia ka Tura Medical College kala iaid kumba 40% bad ong “Ngi la shim ia ka sienjam ban pyniaid sted ia ka jingtei”.
