Shillong, Jymmang 18 : Ki nongialam bad dkhot ka Jaintia National Council (JNC) bad Jaintia Students’ Union (JSU) ha ka sngi Nyngkong, kila iaid paidbah ha Shillong ban dawa pynduh pyndam ia ka public hearing ban wan na ka bynta ka project tih mawshun jong ka Shree Cement Ltd, haba kynnoh ba ka don ka jingpynkhein ia ka Meghalaya Land Transfer Act bad ki jingleh bymhok ha ka Envinronment Impact Assessment (EIA).
Kane ka jingiaid paidbah kala sdang na madan Malki da ka jingthmu ban iatur paidbah sha Secretariat. Hynrei, ki nongiakhih kila shah pynsangeh noh ha shiteng lynti ha ki Pulit bad ki bor district halor ka nongrim ba kim shym la ioh jingbit.
Haba kren ha kane ka jingiakhih, u President ka JNC Sambormi Lyngdoh ula ong “Ngi la sdang ia kane ka jingpyrshah naduh u snem bala lah ha ka por ba pynlong ia ka public heading ba iadei bad ka karkhana Shree Cement”.
“Kaei kaba ngi shem ha ka EIA jong kane ka Shree Cement ka long ba kila pynkhein ia ka Meghalaya Land Transfer Act bad ngi la dep thoh ia ki jingujor sha ki Tnad bapher bapher jong ka Sorkar Jylla hynrei haduh mynta ngim pat ioh satia ia kano kano ka jingpynshai na kine ki Tnad” ong u Bah Sambormi.
U kynnoh ba ha ka public hearing ba long mynshem bnai, “ki briew na ka shnong Daistong kim shym la ioh lad ban leit iashimbynta ha ka public hearing bad ki sengbhalang ruh kumjuh, kila khang ia ngi da kaba pynieng da ki gunda bad ki kali dumper ha shiteng lynti”.
U Bah Sambormi u iathuh ba ka kompani kala pynkhreh ban pynlong biang ia ka public hearing ha ka 22 tarik Jymmang na ka bynta ka jingtih mawshun ha ka jaka kaba heh palat ia ka 217 hectare.
“Kaei kaba ngi shem ha ka EIA ka long kaba sammut bha, nga lah ban ong, namar shuwa ba kino kino ki kompani kin pynlong ia ka public hearing ki dei ban ioh ia ki kyndon ban pynlong na ka Sorkar Jylla” ula ong. “Hynrei kaei kaba jia ha kane ka EIA ka Shree Cement, ngi la shem da kaba shai kdar ba ka kyndon ka dei kaba la ai jingmynjur da ka SEIAA bad SEAC jong ka Sorkar Gujarat. Kumta kane ka long kaba beain”.
“Ngi la thoh sha ki Tnad ba dei khmih bad haduh mynta kim pat ai jubab satia ia ki jingdawa jong ngi” ula bynrap.
“Mynta, ngi la wan sha Shillong ban pynsawa ia ka sor ka jingsngewkhia jong ngi namar ha East Jaintia, ban pynlong ia ka public hearing, ngi tip ba ka Sorkar ka pyrshang ban pyndonkam da ki mafia bad ki gunda ban khang ia ki paidbah na ka jingiashimbynta” ula kynnoh.
“Kumta, ngi na ka JNC bad ka JSU, ngi pyrshah jur ia kine ki sienjam bala shim da ka Sorkar” ula ong haba pynpaw ba mynta kine ki arseng kila pynbna ba ki jingiakhih kim dei shuh pyrshah ia ka Shree Cement hynrei ka long beit beit ia ka Sorkar Jylla namar khlem ka jingbit jong ka Sorkar, ym don satia ki kompani ki ban lah ban pynieng ia ki karkhana hapoh ka Jylla.
Halor ka jingpan jingbit ia ka jingiaid paidbah hynne ka sngi, ula ong “Ngi la pan ia ka jingbit na ki bor District hynrei kila ai jingbit ia ngi tang hangne namar kane ka dang dei tang ka jingsdang jong ka jingiakhih jong ngi. Ngim kwah ban pyndonkam da ka bor. Ngi kwah ban iakhih da kaba jai jai bad ba burom ia baroh arliang, sha ki bor district bad ka tnad Pulit. Ngi wan hangne ban pynsngew shai ia ka sur jong ngi sha ka Sorkar”.
Ula ong ba ia ka sienjam ban sa pynbud yn sa pynbna hadien bala thaw ia ka Committee.
“Hadien kane, ngin sa thaw ia ka Committee kaban kynthup ia ki nongshongshong ka Nongkhlieh Elaka, ka JNC bad JSU bad ngi lah ban khot ia kiwei ki sengbhalang na East Jaintia Hills bad ngin sa pynbna ia ki sienjam ban pynbud” ula ong.
U General Secretary ka JSU Neikee Mukhim ula ong “Ngi iawan shane ban pyrshah ia ka public hearing bad dawa ia ka Sorkar ban pynduh pyndam noh mardor ia ka”.
“U khlieh ka Elaka ula ai jingkren ba ki briew ba nabar ka shnong Daistong kin ym lah ban iashimbynta ha ka public hearing” ong u Mukhim. “Ka JSU, JNC bad ki nongshongshnong ka shnong Daistong kila wan mynta ka sngi da ka mynsiem ba sngewkhia baka Sorkar kala pyndonkam bakla ia ka bor, byrngem ia ki briew ba kim dei ban wan ban pyrshah lan kyrshan ha kane ka hearing”.
 bad Jaintia Students’ Union (JSU) ha ka sngi Nyngkong, kila iaid paidbah ha Shillong ban dawa pynduh pyndam ia ka public hearing ban wan na ka bynta ka project tih mawshun jong ka Shree Cement Ltd, haba kynnoh ba ka don ka jingpynkhein ia ka Meghalaya Land Transfer Act bad ki jingleh bymhok ha ka Envinronment Impact Assessment (EIA).){kind=link}