Pynkynriah ka Sorkar ia ka eksam MTET ba ngat kam lum khana samari bad SIR ki Nonghikai

Shillong, Jymmang 18: U Myntri Rangbah ka Jylla Conrad K Sangma mynta ka sngi ula pynbna ia ka jingpynkynriah shuwa ia ka Meghalaya Teachers Eligibility Test (MTET), kaba la buh ban long ha ka 29 tarik Jymmang.

Kane ka rai kala mih haba jubab ia ki jingkyrpad na ka kynhun ki Nonghikai kiba iakynduh ia ki jingeh namar ki kam ba hap leh na ka bynta ka Ri.

Haba kren ha ka jingialang paidbah ha Damas, North Garo Hills, u Myntri Rangbah ula pyntip ba ki Nonghikai dang shen kila pyntip sha u haba iadei bad ki jingeh ban pynkhreh ia ka eksam. Bun ki hap phiah hapdeng ki kamram ba ki dei ban leh ha ki kamra shim klas bad ka jingbynshet kam na ka bynta ka jinglum khana samari bad ki kam ban leh ia ka Special Intensive Revision (SIR).

“Ki nonghikai ki khuslai bad ki don hapdeng ka jingbym tip kumno kin leh, haba khmih ia bun tylli ki kam kiba la bynshet ha ki mynta.” Ong u Myntri Rangbah.

“Haba pyrkhat ia ki jingeh jong ki, Nga kwah ban pyntip ba ia ka eksam MTET lah pynkynriah shuwa. Ki Nonghikai kim donkam shuh ban khuslai. Ngin sa bishar ia ka jinglong jingman baroh bad sa pynbeit ia ka por bad ka tarik kaba biang ban pynthikna ba kin ioh ia ka por kaba pahuh ba kin pynkhreh.

Nalor ka jingpynbna ia kane ka jingpynkynriah ia ka eksam, u Myntri Rangbah ula pyndonkam ruh ia ka rynsan ban kren halor ka lynti iaid jong ka kam pule dangle ba kham iar ka Jylla. Ula iaroh ia ki nonghikai ka Jylla namar ka jingiai shah ia ki jingeh bad ka jingaiti lut sha ki Khynnah ka Jylla, khamtam haba iakhun ia ki jingeh ba mih na ki rukom treikam kum ki jingduna ha ki jingai jinghikai pyntbit ha ka kam.

Haba pynpaw ia ki prokram kiba khlain jong ka Sorkar bad ka jingkynshew pisa kaba bun ha kine ki snem bala leit, kaba la kyntiew kyrdan bha ia ki jingtei jong ki Iingskul bad nang pynbun ia ki jaka pule, u Myntri Rangbah ula mynjur da kaba shai kdar ba ka kyrdan (standard) kam “pat long kaba la biang”.

“Haba iadei bad ka jingbun, ngi la don bun ki skul, hynrei ngi dang sah shadien ha ka jinghikai kaba bha” kynthoh u Conrad.

“Ban kyntiew ia ka kyrdan pule (standard) kan shim por, hynrei ngi la kut jingmut pura ban pynthikna ba kan urlong. Hynrei, kane ka jingpynkylla kan ym shong tang ha ka Sorkar lane ki Nonghikai. Ka donkam ia ka jingiatreilang kaba kynthup lang ia baroh ha kaba ki Kmie Kpa bad baroh ki kynhun ba don bynta, ki iatreilang ban kyntiew ia ki khynnah pule jong ngi”.