Nongpoh, Jymmang 26: Ki paidbah ka thain Nongpoh hynne ka sngi thohdieng, kila iatur sha ka Iingsah u MLA ka thain Bah Mayralborn Syiem ban kyntu ia u MLA ba un dawa lang ha kaban pynkylla thymmai noh ia ka Reservation Policy ka Jylla.
Kane ka jingiatur kala mih hadien ka jingsakhi ia ka jingiatuid ki paidbah ban ai mynsiem ia u President ka VPP bad MLA ka Nongkrem Bah Ardent M Basaiawmoit, uba shong shah jingit mynta hajan ka Additional Secretariat ban pynbor ia ka Sorkar Jylla ba kan shong bishar thymmai ia ka Reservation Policy.
Haba kren sha ki lad pathai khubor, u samla Aristone Ryndongsngi bad u Bah Arnold Syngkli, kila pyntip ba u MLA Bah Mayralborn ula pynpaw ia ka jingkyrshan ia kane ka jingdawa haba kular ruh ba un sa shimkhia ban iakren ia kane ka kam bad ka party UDP ba kan rah lem sha ka Sorkar Jylla.
Kine ki arngut kila pynpaw ba kane ka jingwan jong ki sha Iingsah u MLA kam shem don satia kano kano ka jingleh politics hynrei ka dei beit thik tang namar ka jinglah shiliang jong kane ka bhah thungkam ia ka jaidbynriew Khasi-Pnar haba pyn shong nongrim kat kum ka jingbun paid.
Ha kajuh ka por, kila kyntu ia ki baroh ki MLA ka Ri-lum Khasi ba ki dei ban leh eiei halor kane ka mat ym ban shu sngap lane hun ban iohi ia ka jingshah nion bein ki khun samla haba bynrap “To tip ba ïa u sdie la pyn ap lypa ha trai u dieng, Jar u dieng u bym sei soh yn khet bad thang noh ïa u ha ka ding”.
