Shillong, Naitung 01: Ka Kynhun Myntri ka Sorkar Jylla ha ka Sngi Baar kala ai jingmynjur ban pynbeit ryntih ia ka rukom kyntiew kyrdan hapoh ka Meghalaya Civil Service Rules, 1975, da kaba thaw ia ki 4 tylli ki Post ne kyrdan Special Secretary ban pynkhlain ia ka jingkiew kam ki ophisar MCS, ong u Myntri Rangbah ka jylla u Conrad K Sangma.
“Ka Kynhun Myntri kala mynjur ia ka jingpynbeit ryntih ia ka rukom kyntiew kyrdan hapoh ka Meghalaya Civil Service Rules, 1975” ong u Sangma haba iakren bad ki nongthoh khubor.
Ula ong, ba kane ka sienjam kan thaw ia kiwei pat ki lad ban kyntiew kyrdan ia ki ophisar Meghalaya Civil Service.
“Ban plie ia ki lad kiba biang na ka bynta ki Meghalaya Civil Service (MCS) officer, ka Kynhun Myntri kala mynjur ban thaw ia ki 4 tylli ki Post kiba thymmai jong ki Special Secretary (Level 22 on the pay scale)” ula ong.
“Kane kan plie ia ka lad ban kyntiew kyrdan ia ki ophisar, ia kaba ka jingshakri kam ka jongki kala shah teh noh ban ym palat ia ka kyrdan kum ki Head jong ka Department” la bynrap u Myntri Rangbah.
U Sangma ula ong ba kane ka jingshim rai kadei ruh ka jingpynurlong ia ka jingdawa kaba la slem jong kane ka kynhun kaba ai jingshakri.
“Ka jingshim rai kala shimkhia ruh ia ka jingdawa kaba lah slem jongka MCS Association bad ka pyni ia ka jingkular ka jong ngi ban ithuh, kyrshan bad thaw ia kiba bun ki lad na ka bynta ki ophisar ki jong ngi haba ki bteng ban shakri ia ki paitbah ka Meghalaya” ula ong.
