Nongpoh, Jymmang 26: Ka long shisha ka jingkmen kaba khraw ymtang ïa ki bor pyniaid skul jong ka Patharkhmah Government Higher Secondary School ne ïa ki kmie ki kpa hynrei ka la long ruh ka jingkmen na ka bynta ka thain Ri Bhoi Sepngi ha kaba u wei u samla pule ba la tip kyrteng kum u Banpynshngainlang Thangkhiew u la ïoh rung ha ka thup jong ka top 10 da kaba wan ba 4 ha ka results Higher Secondary School Leaving Certificate (HSSLC) ba la pynbna da ka MBOSE mynta ka 26 tarik u Jymmang.
U ne u samla u dei ruh u khun phrangsngi jong ka Kong Iohsumarlang Thangkhiew kiba shong ba sah ha ka shnong Umlakro, New Jirang. Ha kane ka eksam HSSLC, u samla u la ïoh haduh 445 marks na baroh ki subjek.
Katkum ka jingïakren bad ka nonghikai jong ka Patharkhmah Govt. HSS, ka la pynpaw ïa ka jingkmen kaba khraw ba ha kane ka sien kaba nyngkong eh kum ka skul sorkar ka la lah ban pynmih ïa u khynnah pule ban poi ha ka thup top 10 khamtam ka long ruh ka burom ïa ka skul, ki Bahaïing hasem bad ka thaiñ Western Ri Bhoi lane ka Ri Bhoi Sepgi.
Na ka liang ka kmie ruh, ka la ai nguh ïa u Blei Trai Kynrad u ba la ri la sumar ïa ki khamtam ïa u khun ba marwei jong ka ha ka jingiaid lynti ha ka jingpule jong u bad ka jingpynkhreh ïa ka eksam HSSLC, ka da ainguh ruh ia ki nonghikai kiba la lah ban ai ïa ka jingnang jingstad ïa u khun tad haduh ba u la kot sha kane ka kyrdan ban ïoh top 4 na ka thup top 10.
U samla Banpynshngainlang Thangkhiew, u la pynpaw, ba kane ka jingkot jong u ha kane ka thong ka dei hi ka jingminot bad ka jingtreishitom ha ka jingpynkhreh ïa ka eksam HSSLC khamtam ka jingai mynsiem bad jingshemphang na ki nonghikai bad ki Bahaïing hasem
