Shillong, Jylliew 30 : Ka Kynhun Myntri ka Sorkar Jylla ha ka sngi Ba-ar kala ai jingmynjur ia ka Meghalaya Money Lenders and Accredited Loan Providers Bill, 2026, ban teh kyndon ia ka jingairam shimet bad iada ia ki nongshim ram na ka jingshah khniot, ong u Myntri Rangbah ka Jylla.
Ka Kynhun Myntri kala ai jingmynjur ruh ia ka Meghalaya Banning of Unregulated Deposit Schemes (BUDS) Rules, 2026, bad mynjur ia ka jingpynkiew kyrdan ia u A. Sangma kum u Legal Remembrancer & Secretary, ka Law Department.
“Ka kynhun Myntri kala ai jingmynjur ia ka Meghalaya Money Lenders and Accredited Loan Providers Bill, 2026,” ong u Conrad haba iakren bad ki nongthoh khubor hadien ka jingialang.
“Kane ka ain ba thymmai ka buh ia ka kyndon ba ki dei ban pynrung kyrteng ban teh kyndon ia ki nongai ram shimet lyngba ki Deputy Commissioner, ka ban pynthikna ia ka jingairam kaba shai, iada ia ka jingkhniot bein bad iada ia ki nongshim ram na ka jingshah oh sut kaba heh” ula ong.
“Kane ka dei ka sienjam kaba donkam ban shim ram da ka jingkitkhlieh bad ka jingiada ha ka liang ka pisa pilain ia ki nongshongshnong ka Meghalaya” bynrap u Myntri Rangbah.
Ka Kynhun Myntri kala pynmih ruh ia ka jingpynbna ia ka Rules hapoh ka BUDS Act ka Sorkar Pdeng.
“La mynjur ia Meghalaya Banning of Unregulated Deposit Schemes (BUDS) Rules, 2026,” ong u Conrad.
“Kine ki rules la thaw da ka Sorkar Jylla hapoh ka BUDS Act ka Sorkar India ban pynkhlain ia ka jing pyntreikam ha Meghalaya bad pynkhlain ia ka jingiada ia ki skhim thep pisa kiba khlem teh kyndon” ula ong.
