Agartala, Iaiong 02: U Myntri Rangbah ka Jylla Tripura Manik Saha u la ong ba ka Sorkar ka la shim ia ki sienjam ba tyngeh ban khanglad ia ki jingwan rung beain ki briew shapoh ka Jylla kynthup ka jingiaid pahara ha ki jaka bym pat ker sainar.
U Manik u la pynpaw ia kane haba jubab ia ka jingkylli ha ka Reference Period ba la wanrah da u MLA u Ranjit Debbarma hapoh ka iing dorbar thawain ka Jylla Tripura.
“Mynta, ki don ki Case bala Register pyrshah ïa ki nongwan rung be-aiñ bad ki nongkhaïi beain hapoh ar tylli ki aiñ kata ka Indian Passports Act bad ka Foreigners Act. Lah ban kdew ba hapoh kine ki ar tylli ki aiñ, la register haduh 112 tylli ki Case ha u snem 2022, 3023 tylli ha u snem 2023 bad 327 ha u 2024” la ong u Manik.
U Manik u la ïathuh ba ha u snem 2024 ka Sorkar kala leh da kaba tyngeh ïa ki nongrung be-aiñ bad ki nongleh bymman haki thain khappud da kaba pyntreikam da ka kyndon Section 370 jong ka IPC (Indian Penal Code) bad Section 143(2) jong ka BNS (Bharatiya Nyay Sanhita), 2023 Act.
“Ki Pulit kila shim ïa ki sienjam kiba bun jait ban tehlakam ïa ka jingpynpoi iaki briew naki thain khappud. Ia ka jingpahara lang la pynlong man ka por ha ki jaka bym don ka jingker sainar ha shilynter u pud u sam jong ka Jylla ha ka jingïatreilang bad ki BSF” u la ong.
“Da kaba pynshong nongrim ha ki jingtip ba ïoh, la pynlong ïa ki jingkhynra pyrshah ïa ki nongkhaii briew kiba donkti ha ka jingkhaii briew na Bangladesh sha India, bad la pynngat haki kyndon ain bapher bapher. Ka kynhun District-level Anti-Human Trafficking Units ka trei shitom ha ka jingïatreilang bad kiwei pat ki bor ka aiñ ban khanglad iaka kam khaii briew” u la ong.
