Shillong, Iaiong 02 : Ka Hynniewtrep Border Disputed Redressal Forum (HBDRF) ha ka sngi Balang, kala kren shai ba kan nym pdiang satia ia ka kaiphod jong ka Regional Committee ba iapynbeit khappud halor ka Block-I namar ba kam pat ju leit jurip ia ki shnong ki thaw.
Ha ka shithi sha u Myntri Rangbah ka Jylla Conrad K Sangma, ka HBDRF kala ong “Kat kum ki khubor ba mih ha ki lad pathai khubor, la pyntip sha ngi ba ka Sorkar kala jan dep artad ia ka jingiakren pynbeit pud ka wat ba-ar bad ka Assam. La iathuh ba ka Regional Committee ka Block-I, ka la pynkhreh ia ka kaiphod ban aiti noh sha ka Sorkar. Hynrei, ngi kwah ban pynpaw ia ka jingsngewkhia bad jingbym hun ia ka rukom treikam Ka Regional Committee namar la tip ba ka Regional Committee kam shym la leh ia ka jingjurip ia ka jaka haduh kine ki sngi, kaba lah ban pynkulmar lut ia ki jingshisha kat kum kaba dei hok.”
Ka Forum kala kyrpad ruh ban aipor iakynduh ia u Myntri Rangbah ban iakren ia ki jingshisha bad ki kot ki sla jong ka thain Block-I.
Haba iakren bad ki nongthoh khubor, u Nongaiktien ka Forum bad Working President ka KHNAM Thomas Passah ula ong “Khlem da leit jurip ia ki shnong ki thaw, lad aka Committee ka shim rai ban aiti ia ka kaiphod, ngi sngew b aka kaiphod kan nym dei kaba pynshong nongrim kat kum kaba dei hok. Ngi la pynpaw ia ka jingdonkam jong ngi hakhmat u CM ba un shah ia ngi ban iakynduh bad u khnang ba ngin lah ban batai ia ka jinglong jingman ka Block-I naduh u snem 1951”.
U Bah Thomas ula kren ruh halor ka video kaba u kynnoh ba u Myntri Rangbah ula ong ba ka Block-I bad II ka dei kaba la aiti sha ka Assam ha ryngkat bad baroh ki kot ki sla.
“Kane ka jingkren ka dei kaba ma bha namar kat kum ka histori, ngi tip ba ka Block-I bad II la rah sha Assam ha u 1951 haba pynshong nongrim na ka jingpynkha ia ki District Council ha u snem 1952 bad ha katei ka por, kam pat don ka jingioh Jylla. Balei ba ia ka Block-I bad II la pyniasoh sha ka Karbi Anglong Mikir Hill Autonomous District Council, ka dei eh namar ka jingsuk ha ka synshar khadar ym namar ba ki jaka ki hap ha Assam lane ha Mikir Hills” ula ong.
 ha ka sngi Balang, kala kren shai ba kan nym pdiang satia ia ka kaiphod jong ka Regional Committee ba iapynbeit khappud halor ka Block-I namar ba kam pat ju leit jurip ia ki shnong ki thaw.){kind=link}