Shillong, Iaiong 29 : U Myntri ka Koit ka Khiah Bah Wailadmiki Shylla ha ka sngi Balang ula ong ba ka Sorkar Jylla kala thung ia ka kynhun ban bishar ia ki jingsngewkhia ba pynsngew da ki nongtrei ka 108 Emergency Services, kiba dawa ruh ban shimti pyniaid hi noh ka Sorkar ia ka kam.
U Myntri u pyntip ba ka Sorkar ka dang ap ia ka kaiphod na kane ka kynhun bad ia ka rai yn sa shim hadien ka jingwanphai jong u Mission Director ka NHM uba leit election duty hadien ka 5 tarik Jymmang.
U Bah Wailad ula pyntip ha ki nongthoh khubor ba ka kynhun ki nongtrei ka 108 Emergency Services kala wan iakynduh ia u halor kane ka kam.
Kat kum ka jingong jong u, baroh arliang mamla ki don iala ki jong ki jingeh.
“Namar peit mynta ki nongtrei ka 108 ki don la ki jong ki jingsngewkhia bad phi tip ruh ba ka Sorkar ka don iala u jong u pud” ula ong haba bynrap ba dei namar kane la bynshet ha ka kynhun ba kan bishar ia kine kiei kiei baroh.
U Myntri ula ong “Ta ka daw ngi la thung ia kawei ka kynhun ba kan shong bishar ba kumno ngin lah ban ai jaka ia ki, kumno ngin lah ban khmih ia ki jingsngewkhia jong ki bad ruh ka Sorkar kan ymhap ban ai bun kiei kiei” ong u Myntri.
“Nga la batai lut ia baroh kine kiei kiei bad ki bad ngi dang ap ia ka kaiphod na ka kynhun” ula bynrap.
U Myntri u ong ba ia kane ka kam yn sa pyntyllun sted noh hadien ka jingwan phai jong u Mission Director ka NHM.
