Shillong, Iaiong 29 : Ka Meghalaya State Planning Board ha ka sngi Balang, kala shong bishar kam halor ka jingpynkhreh jong ka Jylla ban pynlong ia ka National Games 2027 bad ong ba ki jingpynkhreh kila iaid ha ka lynti kaba dei haba shim ruh ia ka rai ban leit jurip ia ki madan ialehkai hashuwa ban ai jingmut sha ka Sorkar.
U Chairman ka Board AT Mondal ula ong ba ia kane ka jingialang bishar kam ym shym la lah shim rai eiei namar ka kynhun na ka Tnad Ialehkai na Delhi ruh kila don hapoh ka Jylla.
“Ka Board kala shong ban iakren sani halor ka jingpynkhreh ia ka National Games, kaba la buh ban long ha u snem ban sa wan” ong u Mondal haba iakren bad ki nongthoh khubor.
“Ka jingialang jong ngi kam shym la lah ban shim rai namar ka don ka Kynhun na ka Tnad ialehkai na Delhi kaba la wan bad ki ruh ki iadon jingialang. Ngin sa iashong biang ha kawei ka por” ula ong.
U Mondal u iathuh ba ka Board kala iakren halor ki madan ialehkai, ki jait jingialehkai, ki jingtei bad ki jingpynbiang ia ki jaka sah, ka bam ka dih ia ki nongialehkai bad ki official.
“Haduh mynta hi ki dang biang lut. Ngi la iakren halor ki madan ialehkai bad haduh katno tylli ki jingialehkai kin long ha Meghalaya bad kiei ki jingtei bad kumno ngi ka pynkhreh” ula ong.
“Kila ai ia ka jingtip kaba bniah bha halor ka jingpynkhreh hynrei ngi la ong ha ki ba ngi donkam ban iashong biang bad ngin sa leit ban jurip ia ki madan” bynrap u Mondal.
U Mondal u pyntip ba ka jingpeitngor kala iaid ha ki kyndan bapher bapher . “Ka Tnad ialehkai bad khamtam ka Ophis u Myntri Rangah kala buddien bha ia kane ka kam bad ka MSPB kat kum ka kamram jong nga, ka ruh kala buddien bha” ong u Mondal.
Halor ki jingsngewkhia ia ka jingdheng kali ha Shillong ha ka por ba iaid ka National Games, u Mondal ula ong ba ia kane ka kam lah dep ban iakren kham hashuwa.
“Hooid, ka Sorkar lehse kala leh eiei halor kane hynrei ngi la dep iakren teng na ka Planning Board, bad la pynsngew ia ka jingai jingmut ba kawei na ki daw ka dei ka jingpynieng kali harud jong ki surok” ula ong.
“Kumta, ka Sorkar kala shimkhia bha ban shna ia ki jaka pynieng kali ha kylleng ka nongbah Shillong bad khlem pep, kane kan sa pynkylluid ia ki surok” ong u Mondal haba pyntip baka Board kan sa pynkhreh ia ki jingai jingmut sha ka Sorkar hadien ba kala dep ban iatai sani bha ia ka kam.
