Shillong, Iaiong 29: Ka Janepih YSCA ka la iai bteng ban lehkai bha bad ioh ia ka jingjop da 6-0 pyrshah ia ka Attong Matgrik FC ha ka Group G jong ka lympung 5th Meghalaya State League ba long ha Williamnagar.
Kane ka long hadien ka jingioh thep hat-trick u Rishembhalang Wanniang (38’, 74’, 90’) bad u Akhebor Langrin (10’, 41’, 45’), kaba la pynthikna iaka Janepih ban jop 4 sien naki 5 tylli ki jingïalehkai ha kaba kala iakhaid shi sien.
Kane ka dei ka jingjop kaba heh tam na bynta ka Janepih ha kane ka lympung bad kadei tang maka ka bym shym pat shah thep wat tang shi goal ha ka MSL 5.
Na ka bynta ka Attong Matgrik kaba don ha ka trai duh jong ka Table, kane ka dei ka jingshah rem kaba 4 naki 5 tylli ki jingialehkai.
Ka la don ka jingkylla ha kaba iadei bad ka jingialehkai, ha kaba ia ki jingialehkai jong ka Group A bala buh ha ka sngi Thohdieng bad sngi Saitjain yn pynlong noh lashai ka sngi ha Madan SSA Shillong.
Ha ka por 1 baje nohphaisngi ka Mawshun SCC kan ïakhun pyrshah ïa ka Khimusniang SC bad ha ka por 5 baje janmiet ka Nongkseh SSCC kan ïakhun pyrshah ïa ka Umkaber SC.
Ha Williamnagar ka Balmanduri FC kan ïakhun pyrshah ïa ka Maram FC ha ka por 3 baje janmiet kumba la buh.
