Shillong, Risaw 05 : U Symbud Myntri Rangbah ba khmih ia ka tnad PWD (Roads) Bah Prestone Tynsong ha ka sngi Nyngkong ula ther kylla ia u President ka VPP Bah Ardent Miller Basaiawmoit bad kynnoh ba ula pynkylla kam politics ia ka jingiap I Khynnah ha Rambrai.
U Bah Prestone ula ong ba ka shnong Domkynroh kaba hap ha Rambrai, ka dei ka shnong ka bym ju iohi ia ka surok naduh ba ka Meghalaya ka ioh iala ka jong ka Jylla.
“Ban iathuh shai ia u bah Ardent Miller Basaiawmoit lane iano iano kiba kren pyrshah ia kane ka jingjia, kane ka Shnong ka dei kawei na ki bym pat ju ioh surok. Kam dei ba ka jingsniew ka surok, ka dei ba kam don surok hi ruh” ong u Bah Prestone haba pynshai ia ka jingjia ha Rambrai.
U Bah Prestone ula pyntip ba ka Sorkar kala dep ban leh eiei halor ka jingdawa kaba la slem bha jong ka thain.
“Ha ki khyndiat bnai bala lah, Nga la buh ia u mawnongrim ban sdang shna ia ka surok napdeng jong ka Rambrai kum shibynta jong ka plan ban pyniasoh shaduh sha Nongnah. Ngi la mang T.25 klur bad la dep ai ruh ia ka preliminary work order” ula ong.
Ula bynrap ba ka jingtrei kan sa sdang shisien ba la dep pynkhreh ia ki kam da u contractor bad pynpaw ia ka jingkyr men ba ka project kan iarap bha ia bun ki shnong.
“Nga kyrmen skhem ba kane ka surok ban pynmyntoi haduh 8-9 tylli ki shnong ki bym pat ju ioh surok naduh ba ngi ioh iala ka jong ka Jylla” ula ong.
Haba pynpaw ba ki jingpyniasoh surok ki dei ki kam ba hakhmat eh ka Sorkar naduh u 2013, u Bah Prestone ula iathuh ba bun ki shnong ki bym pat ioh surok kila ioh surok myta bad ki surok khlaw ruh kiba bun la dep ban shna bha.
Haba kubur ba ki jingduna ki dang don, ula ong “Ngam ong ba 100 percent lah dep ban leh, ki dang don shibun kiba hap ban leh. Phim lah ban ong ba haba ym don surok, phi hap ban ai surok sha ki 101 percent ki shnong. Ngi la pyrshang ban pynpoi surok sha kito ki shnong ki bym pat don surok bad ngi la kut jingmut ba man ki shnong ki dei kiba la pyniasoh surok”.
