Shillong, Risaw 5: U Symbud Myntri Rangbah ka Jylla uba long ruh u President ka NPP Meghalaya u Bah Prestone Tynsong, hynne ka sngi Nyngkong ula kyntait ia ki khubor ban ai bhah shuki myntri ia kiba la leit pyniasoh thymmai bad ka BJP bad ka bynrap ba ka sorkar synroplang jong ka MDA ka long kaba skhem.
Haba kren halor ki khubor kiba la saphriang, u Bah Tynsong ula buh jingkylli ia ki tyllong jong kitei ki jingtip kiba la iohlum.
“Nga lah iohi ha ka kot khubor ka jong phi, hynrei ngam tip pat, naei phi lah ioh ia katei ka tyllong khubor. Nga kwah ban kylli na phi baroh, mano ba la pynmih ia katei ka jingkren bad naei phi lah ioh ia katei? Ha kaba iadei bad ka NPP, kam shim la don kano kano ka jingbuh kyndon, la kadei na ki nongialam kiba hakhlieh duh jong ka BJP ne na ki nongialam kiba hakhlieh duh jong ka NPP” ula ong.
Ula ong, ba kam don kano kano ka jingma ia ka sorkar synroplang bad ka sorkar ym tang ba kan pyndep ia kane ka samoi treikam kaba mynta hynrei kan iai bteng shuh shuh.
“Em, ngim don satia ia kano kano ka jingeh. Ka sorkar MDA kan bteng ban iaid shakhmat, ngi ngin pyndep pura bad ngi ngin bteng ban jam shakhmat shuh shuh nalor jong kane ka samoi treikam” ula ong.
Haba kylli la ka don kano kano ka jingpyrshang na ka BJP ban pynkut noh ia ka jingialam ka NPP. U Bah Tynsong ula ong, ba kam don satia.
“Kam don satia kano kano ka jingpyrshang kaba kum katei” ula ong
