Shillong, Risaw 5: Ka Sorkar Jylla ha ka sngi Nyngkong, na ka jingsei madan ka KSU ia ka jinglum pisa be-ain da ki pulit kadei ka sienjam kaba ka pdiang sngewbha bad kine ki pulit kiba donkti kila shah suspon.
U Symbud Myntri Rangbah uba khmih ia ka Kam Pohiing u Bah Prestone Tynsong ula ong, ba ula bthah ba dei ban leh mardor da kaba tyngeh hadien ba ki video kila saphriang ha ki social media.
“Ngi lah ioh jingtip, ha katei ka sngi hi, kaba ki dkhot ka KSU kila leit sha katei ka jaka. Nga lah iohi ruh ha ki social media. Kumta mardor hi, nga lah bthah ia ka DGP ba dei ban leh da kaba tyngeh bad ka DGP ryngkat bad u SP kila leh bad pyndep ia ka kam” ong u Bah Tynsong.
Ula ong, ba ka sorkar ka pynshlur ban pyntip shaphang kitei ki rukom leh kiba be-aiñ.
“Lada don mano mano kiba pyntip sha ngi shaphang ka jingleh buiituh da kino kino ki tnad sorkar, ngin pdiang beit. Ngin shim ia ki lad ban pynbeit da kaba leh da kaba tyngeh pyrshah ia ki nongtrei ne ki ophisar kiba dei khmih ne ia ki pulit” ula ong.
Haba kyntait ia ka jingdawa ka KSU ban weng noh ia u SP, u Bah Tynsong ula ong, yn ym lah ban pynkitkhlieh ia u SP halor katei ka jingjia kaba la leh da ki pulit kiba bat ia ka kyrdan kaba rit.
“Ban weng ia kaei? Um dei u SP uba la pynlong ne bthah ban dawa pisa. Ki lah ban don katto katne ki jingjia kiba la jia. Ka long kaba bha ba lah pyntip sha ki bor kiba dei khmih bad la shimkhia mardor da kaba leh da kaba tyngeh” ula ong.
