Shillong, Nailar 06: Ka Shillong Premier League 2025 kala sdang da ka jingshongshit ha kaba ka Nangkiew Irat kaba la shah thep kol kala wanphai bad ialehkai bha ban ioh khur ia ka jingjop da 3-1 pyrshah ia ka Nongrim Hills 3-1.
Mar ia sdang ka jingiakhun u Caldolan Kharmawphlang ula thep ia ka kol ha ka 13 minit na ka bynta ka Nongrim Hills.
Ka Nangkiew Irat, kaba la don ha Top 4 ha ka samoi ialehkai kaba la dep, kala ioh ban pyniakhiad hashwa ban kut noh ka kylla step hadien ba kala don ka jingbakla na ka jingthep kol hi da u nongialehkai ka Nongrim Hills ha ka minit kaba 41.
Ka Nangkiew Irat kala bteng ban ialehkai bha ha ka kylla miet bad kala ioh ban thep ia ka kol ka baar ha ka minit kaba 60 lyngba u Jefferson Pakyntein bad tang hadien 2 minit u Himanshu Patil u la ioh ban thep ia ka kol ka balai ia ka Nangkiew Irat.
Ia kane ka jingialehkai la pyniakhun hapdeng ka jingslap jur la jan 90 minit.
Hashwa ba kine ki rang ialehkai kin mih ha madan, la leit ban khublei kti bad kitbok kitrwiang da ki nongialam jong ka Shillong Sports Association, ki nongpyniaid jongka SPL hapoh ka jingialam u President ka SSA u Bah Banteidor Lyngdoh uba long ruh u MLA.
Lashai ka sngi, ka jingiakhun kan long ha ka por 5:30 janmiet hapdeng ka Sawmer pyrshah ia ka Mawlai.
