Guwahati, Lber 30: Ka Assam Pradesh Congress Committee hynne ka sngi u Blei kala beh seng na ka bynta 6 snem ia ki 15 ngut ki dkhot da kaba pynpaw ba kila pynkhein tyngeh ha kaban bud ryntih ia ka rukom treikam bad kila ialeh pyrshah ia ka seng, ia kane la leh ha ki sngi shwa ban long ka elekshon Assembly.
Ia kane ka rai la mynjur da u President ka Assam Congress u Gaurav Gogoi ha ka khyllipmat kaba long kongsan bha ha ka jingiaid ka elekshon.
Ha ka kyrwoh kaba la phah, ka seng kala ai ia ka kyrteng jong ki dkhot kiba la shah beh seng bad ia ka constituency ka jongki, watla kam shim la batai bniah ia ki daw pyrshah ia kitei ki riewshimet.
Kine kiba la shah beh seng ki kynthup ia u Bhaskar Jyoti Baruah (Titabor), Abul Miah (Gauripur), Aftadur Ali Khan (Chenga), Tapan Das (Udharbond), Sandip Das (Katigorah) bad Jahurul Islam Barbhuiya (Borkhola).
Ha kane ka thup kala don ruh ka kyrteng jongu Aziz Ahmed Khan (Karimganj South), Anup Kumar Das (Ram Krishna Nagar), Labaniya Boro (Boko-Chaygaon), Nitul Das (Dimoria), Girindra Kumar Bhuyan (Rangapara), Pallabi Saikia (Tezpur), Mukut Das (Raha), Biju Dowarah (Khowang) bad Aynul Hoque (Dalgaon).
Kane ka jingbeh seng kan treikam mardor bad kan neh haduh 6 snem, la pynpaw ka seng Congress.
Kane ka jingshim rai pynshitom kala wan haba ka Assam kala pynkhreh ban pynlong ia ka elekshon ha ka 9 tarik u Iaiong bad ia ka Result yn pynbna ha ka 4 tarik u Jymmang.
