Nongpoh, Lber 29: Hadien ka jingiawad khlem sangeh, kawei ka longiing kala lap biang iala ka khun ba dang 24 snem, kaba la jah rngai nala iing naduh ka 25 tarik Lber.
Kane ka samla ba kyrteng ka Larikynti Nongbet, kaba dei na Umsaitsning, Lad Mawiong, Ri-Bhoi, la lap ha ka 28 tarik Lber.
Ki bahaiing kim pat kwah ban kren eiei halor kane ka jingjah bad pyntip ba kane ka samla ka la don mynta hapdeng ka jingshah sumar ha Bethany Hospital, Nongpoh.
Ki la iathuh ruh, ba hadien ba la lap ia ka, nyngkong kila ialam ban sumar ha Umsning CHC bad nangne la ialam pat sha Bethany Hospital.
Na ka liang ki bahaiing hasem, ki la ai khublei ia baroh kiba la ia donlang ha ka jingia wad ia kane ka samla kaba la jah na la iing kiba kynthup naduh ki pulit ka Umsning Police Station, ka Dorbar Shnong, ki Seng Samla, Seng Kynthei, ki dkhot ka RBYF Umsaitsning, ki paralok parajor bad ruh ia ki bahaiing hasem.
