Shillong, Nailar 06 : U Myntri Rangbah ka Jylla Conrad K Sangma ula bthah ia ka Tnad ka Koit ka Khiah ban tohkit kyrkieh ia ki daw tynrai ha lyndet ka jingiai slem ban siew ia ka pisa jong ka Meghalaya Health Insurance Scheme (MHIS) bad ruh ia ka jingkyntait ia ki jingkam (claim) ban ioh ia ka skhim.
U Myntri Rangbah ula bthah ia kane ha ka jingialang bishar kam halor ka jingpyntreikam ia ka MHIS ha Jylla haba bthah ruh ban shim noh mardor ia ki sienjam ban pynbeit khnang ban pynthikna ia ka jingtreikam bha jong ka skhim.
Ha kane ka jingialang bishar kam la iashimbynta ruh da ka Myntri ka Koit ka Khiah Dr Ampareen Lyngdoh bad ki Heh Ophisar ka Tnad ka Koit ka Khiah.
Haba kynthoh ha X, u Conrad ula ong “La shong bishar ia ka jingpyntreikam ia ka Meghalaya Health Insurance Scheme (MHIS) ha ryngkat ka Myntri ka Koit ka Khiah Dr. @ampareenlyngdoh bad ki heh Ophisar ka Tnad ka Koit ka Khiah. La bthah ia ka Tnad ba kan shong bishar mardor halor ki daw ha lyndet ka jingslem ban siew bad ka jingkyntait ia ki jingkam ban ioh ia ka skhim, bad ruh ban shim ia ki sienjam ban pynbeit khnang ban pynthikna ia ka jingpyntreikam bha bad kaba shai ia kane ka skhim, ba kan ai jingmyntoi ia baroh ki nongshongshnong ka Meghalaya”.
Ka MHIS ka dei shibynta na ka jingpyrshang jong ka Sorkar ban pynjanai ia ka jingshakri ha ka koit ka khiah bad ban iarap ia ki nongshongshnong ha ka jinglut jingsep ha ka pang ka shitom. Ka jingpyntreikam bha ia ka skhim ka long kaba kongsan ban pynthikna ba ki nongshongshnonng kin iohi ia ki jingsumar ba ki donkam khlem da tynrong ia ka jingkit ba khia ha ka pisa pilain.
 bad ruh ia ka jingkyntait ia ki jingkam (claim) ban ioh ia ka skhim.){kind=link}