Shillong, Nailar 9 : Ka Rangdajied United FC ka la ioh ban pynliem haduh 3-0 kol ia ka Nangkiew Irat ha ka jingiakhun kaba 33 jong ka Shillong Premier League 2021-2022 kaba long ha madan Third Ground, Polo Shillong.
Lah ban kdew hangne ba ka Rangdajied ka la ioh ruh ban pynliem da 3-1 kol ha ka kylla kaba nyngkong jong ka SPL kaba long ha ka 12tarik Naitung, 2022.
Ia kitei ki kol jong ka Rangdajied la ioh ban thep da u Raikutshisha Buam ha ka minit kaba 13 bad 52 katba ia ka shi kol pat la thep da u Oresterwell Lyngshiang ha ka minit kaba 33 jong ka kylla step.
Haba phai sha ka jingiakhun, ka Rangdajied tang ha ka kylla step ka la ioh ban thep lypa haduh ar kol, kata lyngba u Raikutshisha ha ka minit kaba 13 katba ia kawei pat ka kol la ioh ban thep da u Oresterwell ha ka minit kaba 33 kaba pynlong ia ka kynhun ban ioh lamkhmat da 2-0 kol tang ha ka kylla step.
Wat hadien ba ka Nangkiew Irat ka la iakhun tyngeh ruh hynrei kam shym la ioh lad satia ban pynphai wat tang shi kol ruh hynrei ha ka minit kaba 52, ka Rangdajied ka la ioh biang ban thep sa shi kol ban pynskhem syndon ia ka jingjop da 3-0 kol.
Kumba long mynta, ka Rangdajied ka la ioh ban lamkhmat da 12 point ha ka kyrdan kaba saw katba ka Nangkiew Irat pat ka don ha ka kyrdan kaba san da ki 9 point kaba mut ki iapher tang da lai point.
Ka jingiakhun la shai ka sngi pat kan long hapdeng ka lahduh ba mynshwa ha ka lympung ka Shillong Lajong kaba don mynta 8 point pyrshah ia ka Ryntih kaba don 14 point.
Kumban shu phai dien khyndiat, ak Ryntih ka la ioh ban thep haduh 3-0 kol ia ka Lajong ha ka kylla kaba nyngkong.
