Shillong, Nailar 09: Ka kynhun ki Samla Nongialam ka National Peoples Party na Ri-lum Garo, kila iakynduh ia u Myntri Rangbah ka Nagaland u Neiphiu Rio bad kyrpad ba un tuklar ha kaban pynioh ia ka jingbishar kaba hok sha ki bahaiing ka Rosy Sangma bad Samuel Sangma, kiba la iap ha New Delhi ha u bnai Jylliew 2021.
Kine ki Nongialam na Ri-lum Garo kila iakynduh ia u Rio hynne ka sngi ba-ar ha Kohima bad kila ban jur ba un tuklar lem ha kaban pynthikna ba ki briew ba donkti halor ka jingiap kine ki shipara kiba dei ki Garo ba sah ha Nagaland, kin ioh ia ka jingbishar kaba hok.
Lah ban kdew hangne ba u Myntri Rangbah ka Jylla Conrad Kongkal Sangma bad ka MP na Tura ka Agatha K Sangma kila tynruh ia ka Sorkar Pdeng haduh ba poi sha ka jingthung ia ka jingtohkit CBI.
Ka kaiphod tohkit CBI kaba la pyllait paidbah ha ka taiew bala lah, kala kynnoh ia ki Doktor ka Alfaa Medical Hospital Gurgaon ba kila sumar torti kaba lam sah ka jingiap ka Rosy Sangma, kaba trei kum ka Air Hostess, kaba la poi sha kane ka jaka sumar hadien ka jingioh pang.
Ka kaiphod CBI kala kynnoh ia ka hospital ba kam shym la ai ia ka jingsumar ha ka por kaba biang ia ka Rosy kaba poi shaduh u pud ka jingiap.
Hadien shisngi, la lap pat sa ia u para arkmie jong ka, u Samuel Sangma halor u tyllai phasi ha ka iingsahwai ha New Delhi.
Ka NPP ka kyrpad ia u Myntri Rangbah ka Nagaland ban buddien ia kane ka kam bad ban pynthikna ba ka dei ruh ban don ka jingtohkit CBI halor ka jingiap jong u Samuel.
“Ka jingiap u Samuel tang shisngi hadien ka jingiap ka Rosy ka dei ka kam ka bym lah satia ban shu phai lyndet bad dei ban phah tohkit lang ha ka CBI khnang ban lap ia ka jingshisha” kila ong.
Ki Nongialam ka NPP kiba la iakynduh ia u Myntri Rangbah ka Nagaland ki kynthup ia u NPP state working president Dabo Marak, MDC ka NPP ha GHADC Aldo A Sangma, George Balcheng Marak, Tengrik M Sangma, Silban R Marak, Manhu Marak, Feroz G Momin bad Bremil Sangma.
