Shillong, Lber 14 : U Nongialam ka NPP bad Symbud Myntri Rangbah Bah Sniawbhalang Dhar hynne ka sngi ba-ar, ula ong ba ka NPP kan sa leh ia ka ‘Post Mortem’ ne ban tih tynrai ia ka daw halor ka jingbym lah ban leh bha jong ka party ha Ri-lum Khasi ha ka elekshon MLA ba dang shu dep long.
“Ngin sa tih tynrai ia ki daw halor kane hadien ka Dorbar Mang tyngka jong ka IIngdorbar Thaw Ain” ong u Bah Sniawbha haba iakren bad ki nongthoh khubor.
Ka National People’s Party (NPP) kala jop tang 9 seat na Ri-lum Khasi bad Jaintia. Napdeng kine, artylli ki dei na East Khasi Hills District.
“Ka result ha Ri-lum Jaintia ka biang namar ngi la khein antad ban ioh 4-6 seat. Kumjuh ruh, ha Ri-Bhoi, ngi la antad ban ioh 1-3 seat hynrei ngi khlem poi pyrkhat ha Ri-lum Khasi” ula ong.
Haba kylli la ka jingsngew pyrshah u paidbah ia ka NPP ha ka Ri-lum Khasi ka kham jur, u Bah Sniawbha ula ong “Ka long kaba eh ban ong namar ngim pat tip ia ka daw tynrai balei ba ngi rem na bun tylli ki constituency ha Ri-lum Khasi.Namar kata, ngin sa tih tynrai ia ki daw tang mar syn kut ka Dorbar Mang tyngka khnang ba ngin lah ban leh bha haka elekshon ban wan”.
U Symbud Myntri Rangbah ula kyntait ban mynjur ba ki paidbah ka Ri-lum Khasi kim pdiang ia ka NPP bad ong “Ki don bun ki daw. Phi tip ha Ri-lum Khasi, ki don shibun ki seng sain pyrthei-ka UDP, PDF,BJP, NPP, VPP. Hynrei kam mut pat ba ym pdiang ia ka NPP. Ban ioh 26 seat ha baroh kawei ka Jylla kam dei ka kam kai”.
Haba kynthoh ia ka jingiakhih ba dawa Myntri Rangbah na Ri-lum Khasi-Jaintia, u Bah Sniawbha ula ong “Ban dawa Myntri Rangbah da u Khasi nga sngew ba ka long kaba bakla namar ngi hap ban burom ia ka rai u paidbah”.
U ong ba lada ki paidbah ki kwah ba u Myntri Rangbah un dei na Ri-lum Khasi Jaintia, ai ba kin vote ia kawei ka Party ha ka thain.
“Ai ba kin vote tang ia kawei ka party na Ri-lum Khasi-Jaintia. Ki lah ban vote ia ka UDP, ne NPP lada ki kwah hynrei kila vote ia ki party bapher bapher. Ngan ong aiu shuh” ula ong.
Ha kawei ka liang, u Bah Sniawbha ula kubur ba ka lawei jong ka party ha ki katto katne ki constituency kum ha Nongkrem bad Mawlai kila shah ktah jur bha na ka jingmih jong ka party thymmai Voice of the People’s Party (VPP).
Haba phai sha ka result elekshon jong ka All India Trinamool Congress (AITC) bad ka Bharatiya Janata Party (BJP), une u Nongialam ka NPP ula ong ba kine baroh artylli ki party ki dei ki bym pat pdiang satia hapoh ka Jylla.
“Lada ka party ka lah ban ioh tang 2-3 seat ka mut ba ki dei ki bym pat pdiang da ki paidbah ka Jylla” ula bynrap.
