Shillong, Lber 14 : U Symbud Myntri Rangbah ka Jylla (DyCM) ba khmih ia ka Tnad pynroi sor Bah Sniawbhalang Dhar, ula khot ia ka jingialang lashai ka sngi Balang ban shong bishar halor ki project ba dang iaid jong ka Tnad nalor ban iasyllok ruh halor ka jingpynkynriah ia ki 342 tylli ki Longiing na Them Metor, Them Iew Mawlong.
“Ngan sa shong bishar kam halor ka jingiaid jong ki project ka tnad kynthup ka Smart City Project lashai ka sngi” ong u Bah Sniawbha haba iakren bad ki nongthoh khubor.
Ula ong ba katto katne na ki project ki kynthup ia ka Iew Laitumkhrah, Iew Polo, Smart roads bad kiwei kiwei. “Ngan sa tip ia ka jingiaid ka kam bad ka jinglut ka pisa jong kine ki project hadien ba nga la shong jingialang bishar kam” ula bynrap.
Haba pynpaw ba ki project bapher bapher ki don la ka jong ka por ban pyndep, u Symbud Myntri Rangbah ula ong “Ngan pyrshang ban leh ia kat kaba lah ha kine ki sngi ban wan ban pyndep ia ki project ha ka por bala buh”.
Ula bynrap ba ka Jylla kam don jingeh satia haba phai sha ka jingioh song pisa bad ong ba ka jingwan jong ka pisa na ka Sorkar Pdeng bad ka Sorkar Jylla kala iaid beit iaid ryntih.
U Bah Sniawbha ula pyntip ruh ba un sa khot ia ka jingialang ha ka kyrdan jong u, ban iakren bad iasyllok halor ka jing pynkynriah noh ia ka Them Metor na Them Iew Mawlong.
“Ngan sa khot ia kane ka jingialang ha ka kyrdan jong nga kum u Myntri pynroi sor. Hadien kane, u Chairman ka High Level Committee un sa khot ia ka jingialang bad ngin sa shim ia ka rai (halor kane ka kam” ula ong haba bynrap “Lashai ka sngi, ka jingialang kan long ha ka kyrdan jong nga bad hadien kane ngin sa shong kum ka Jylla. Hooid, ngi hap ban khot ia ki (Harijan Panchayat Committee). Ka Iingkashari kala ai ia ka por bad ngi kwah ban pynbeit noh kham kloi kat kaba lah”.
U Bah Sniaw bha u pyntip ruh ba ka Jowai Beautification project ka dang iaid shakhmat bad haduh 90 % na ki project shna surok ha kane ka sor kila dep lut. Kat kum ka kaiphod, ki surok kin dep hapoh kine ki 10 sngi ban wan.
Haba phai pat sha ka Tnad Home (Jail), u Bah Sniawbha ula ong ba um pat iakynduh satia ia ki Ophisar jong ka Tnad. Ula iathuh dang shen ba ka Sorkar Jylla kala thmu ban wanrah ia ka Central Jail hynrei ia ka jingtip ba bniah halor kane ka jingtyrwa yn sa tip hadien bala shong ia ka jingialang bishar kam ka ban long lashisngi.
