Shillong, Lber 14 : U Symbud Myntri Rangbah Bah Sniawbhalang Dhar hynne ka sngi ba-ar, ula ong ba ka jingpyntrei ia ka MTC Project ba T. 216 klur ka dang iaid shaid shaid.
“Kam shym la don satia kano kano ka jingeh namar baroh kila iaid kat kum ka Detailed Project Report (DPR)” ong u Bah Sniawbha haba iakren bad ki nongthoh khubor.
Ula pyntip baka Sorkar ka don jingthmu ban shna ia ka Hotel bad ka Multipurpose Building ha kane ka jaka kaba la buh ban pyndep hapoh ka arsnem shiteng. Ia kane ka project la pyntrei ha ka jaka jong ka Meghalaya Transport Corporation kaba don ha Khyndailad.
Hynrei ula ong ba ki don katto katne ki jingeh bad ki nongshongwai. “Ngan sa shong bishar ia ki kam ki jam lashai ka sngi. Kine (nongshongwai) kim shym la ong ba kim mynjur ban mih hynrei kila buh kyndon bad ngin sa iakren bha lashai ka sngi. Ka kyndon ka dei kaba biang bad ngi la dep mynjur ba hadien bala pyndep ia ka project ngin sa ai jaka ia ki” ong u Bah Sniawbha.
Ia ka Ophis jong ka MTC la pynkynriah mynta sha Mawiong ha ISBT.
Shuwa ka elekshon, u Nongialam ka BJP bad Myntri Sorkar Bah A.L.Hek ula ong ba u lah ban tei ia ka “Taj Maham” da T. 240 klur, ka pisa kaba ka Sorkar MDA kala tyrwa ban pynlut ha kaban tei jingtei ha ka jaka ba 50,000 sqft jong ka MTC ha Khyndailad.
Halor kane, u Bah Sniawbha ula ong ba ka jinglut jong kane ka project ka long T. 216 klur ym T. 240 klur kumba la kynnoh. “Nalor kane, ka project ka dang iaid shaid shaid mynta. Kumno u lah ban ong ba ka dei ne bakla” ula ong.
Kat kum ka jingong jong u, ka rai ka dei kaba la shim da ka kynhun Myntri. “Ngin sa iapeit hadien bala dep. Phin sa iohi ia ka jingkylla dur jong ka Police Bazaar kat kumkane ka juk ba mynta” ula ong.
