Itanagar, Lber 14 : Ki pulit ka Arunachal Pradesh mynta ka sngi ki la kem ia hynriew ngut ki cadet SubIinspector napoh ka North East Police Academy ha Shillong, Meghalaya halor ka jingshah kynnoh donkti halor ka jinglaittuh ka jingkylli jong ka eksam ba la pyniaid da ka Arunachal Pradesh Public Service Commission (APPSC).
Kine ki hynriew ngut ki SubIinspector ki la shah sloit noh na ka kam hadien ba ki la shah kem noh. Ia kine ki briew kiba la shah kem la tip kyrteng kum u Yon Talom, Pakjum Gamlin, Jembang Darang, Kangkeng Garu, Kaling Jerang bad u Kali Yomcha.
Ka jingweng kam noh ia kine ki hynriew ngut ki Sub Inspector la pynbna lyngba ka hukum ba la pynmih ha ka 3 tarik mynta u bnai da ka ophis jong u Director General of Police, Itanagar, ha kaba la kdew shai ba ki jingleh jong kine ki Sub Inspector kiba la shah kynnoh donkti kam iahap satia ba kin long ki shakri sorkar.
Ka Iingkashari District & Session ka Yupia Papum District, kala hukum ia u briew ba suhbuit ha ka jingpyllait tuh ia ka jingkylli jong ka Arunachal Pradesh Public Service Commission (APPSC), uba dei ruh u deputy secretary barim ka APPSC u Taket Jerang, ba un ai da ka jingthoh ha kaba iadei bad ka jingsoi kyrteng ne signature halor ka jingkylli kaba la laittuh khnang ban bishar bniah halor kano kano ka jingleh thok.
“Namar ka jingkhia jong kane ka kam kaba long beain, une u briew uba la shah kynnoh donkti um lah satia ban kyntait, bad kaba donkam ruh ban leh da ka bor bad ka shong ha ka rai jong ka iingbishar,” pynpaw u Public Prosecutor ka CBI.
