Jowai, Nailar 04: Ka Thomas Jones Synod College, Jowai hynne ka sngi kala pynlong ia ka jingiakop riam tynrai hapdeng ki samla pule jong ki College bapher bapher, kaba la pynshohbiej bad pyniapmat ia ka jingriewspah ka snap tynrai jong ka Jaidbynriew.
Ia kane ka jingiakop la pynlong kum shibynta jong ka jingrakhe ia ka jubili rupa bad bun ki college na Ri-lum Jaintia kila wan ban iashimbynta ban pyni nam ia ka riam tynrai ka thain.
Ki College kiba la wan iashimbynta ki kynthup ia ka Jaiñtia Eastern College, Khliehriat, Amwi College, Mihmyntdu, Riwar College, Amlarem, Kiang Nangbah Government College, Jowai, Thomas Jones Synod College, Jowaim Ummulong Presbyterian College bad St.Anthony’s Extension, Byndihati.
Ha kane ka jingiakop, ka Kiang Nongbah Govt College bala mihkhmat da u samla Trebokmi Talang bad samla Sophia Laloo, kala ioh khur ia ka nam kum ka lahduh.
Ka St Anthony’s Extension, Byndihati bala mihkhmat da u samla Mudang Dree bad Puri Jusmi kala wan ha ka kyrdan ba-ar.
Nalor kane, la pynlong ruh ia ka jingiakop shad bad rwai tynrai hapdeng ki samla pule jong ki Tnad pule bapher bapher ka Thomas Jones Synod College.
La pynshongkun ia kane ka jingrakhe da ka jingiadonlang u Deputy Chief Executive Member (CEM) ka JHADC ma Lasky Rymbai uba la shah khot kum u kongsan bad kiwei kiwei ki kynrem ki lyndan.
