Shillong, Nailar 04: Ki Pulit ka Nongbah Shillong kila ioh ban kem ia 2 ngut ki snar nongtuh bad uwei u nongpyniaid iew ia ki tiar tuh, ha ka jingkhynra bala pynlong hapoh ka Nongbah Shillong, kaba la lam ruh sha ka jingioh kurup biang ia bun tylli ki laptop, ki camera bad mobile phone.
Kine ki snar nongtuh ki dei kiba la tip kyrteng u Wanstep Lyngdoh ba 27 snem ba sah ha Nongrim Hills bad u Banroplang Jyrwa ba 24 snem uba sah ha Rngijynriew Neng, Nongthymmai.
Kat kum ka jingiathuh u Superintendent of Police ka East Khasi Hills, ia kine ki arngut ki Nongtuh la ioh ban kem da ka kynhun iaid pahara bala lamkhmat da Sector Officer ka Rynjah Kong Jyoti Wahlang MPS, u Sub Inspector P Syiem I/c ka Nongthymmaiu bad ki Pulit ka Rynjah. Kane kala jia ha ka 2 tarik Nailar.
Une u Heh Pulit u pyntip ba kine ki arngut kila phla ia ka jingdonkti ha ki kam tuh kam thiem bala register case hapoh ka Rynjah Police Station kat kum ka Case No.117(07)2022 U/S 454/380 IPC.
Ha ka jingtohkit, kine ki arngut kila phla ba ia kine ki tiar tuh la die sha uwei u briew ha ka thain Iew Mawlong.
La iathuh ba ha ka 3 tarik Nailar, da ka jingiarap u Sub Inspector J Wahlang I/c ka Contonment bad ka kynhun Pulit jong u, kila ioh ban kem ia une u briew ba thied ia kine ki mar tuh, uba la tip kyrteng u Abdul Motalif ba 21 snem ka rta uba na Iewmawlong.
Da kane ka jingiohkem, ki Pulit kila ioh ban kurup ia kawei ka Asus Laptop, ar tylli ki HP laptops, kawei ka Dell laptop, kawei ka Canon Power shot SX430 IS, kawei ka Canon camera IXUS, bad kawei ka VIVO mobile phone.
